有睇本地波嘅球迷應該記得早排南華引入過一名喺巴西出生有巴西同東帝汶國籍嘅東帝汶亞援球員Murilo de Almeida(阿米達)，你知道嗎？，呢位球員係史上第二位登陸印尼聯賽嘅東帝汶球員，隨後有唔少東帝汶球員跟隨阿米達步伐去印尼踢職業聯賽，呢批東帝汶球員大部分都喺巴西出生，但大部分喺巴西發唔到圍只好去亞洲搵機會，印尼曾經係東帝汶球員其中一個理想落腳地，不過今年東帝汶足球起咗大變化，話唔定未來東帝汶血統球員嘅戰鬥賽場唔再係泰國、馬來西亞、印尼等地，可能會選擇返國。
你知道嗎？今年二月，得到各企業及社會、政府支持下，東帝汶史上首個職業足球聯賽Liga Futebol Amadora(LFA聯賽)成立，即使有唔少海外球評家認為LFA末到達職業級數，但呢個確實係東帝汶足球一個里程碑。
喺二十一世紀嘅東帝汶依然非常落後，一啲你可能從未聽過嘅縣份例如勞滕縣，連最基本嘅電都冇供應，更唔好話睇電視同上網，基本上葡萄牙殖民時傳入嘅足球成為咗當地居民最廉價嘅娛樂運動，而好多青少年都鐘意踢足球，足球成為東帝汶人嘅生活。
提到青少年，你哋可以睇睇，近年東帝汶嘅青年梯隊喺亞洲嘅戰積唔差，但好多青少年球員都面對一個問題，就係東帝汶冇職業足球聯賽，長大後必需搵其他工作，因此唔少有潛質嘅球員最終都會消失，令到東帝汶國家隊只能靠血統球員去撐住。
現時有咗職業聯賽對東帝汶青少年球員係有好大幫助，最起碼有個平台可以繼續你嘅足球夢，但係聯賽只有本地球員撐住點夠，因此東帝汶球隊就向鄰國印尼球員招手搵佢哋做外援增加賽事強度，由於部分東帝汶球隊向印尼球員提供最少四千蚊美金月薪，所以最高峰時期有接近十名印尼球員登陸LFA聯賽，除此外亦有巴西、智利等南美球員去到LFA搵食，甚至有巴西籍教練，但幾乎都係喺印尼挖過去。
首屆LFA職業足球聯賽共有八支球隊參加，包括AS Academica(科英布拉)、Aitana(艾塔那)、Carsae FC(凱撒FC)、D.I.T、Karketu Dili FC(帝力)、AS Ponta Leste(寶沙達)、FC Porto Taibesi(波圖)及SLB，而次級聯賽共有十三支球隊參加，包括Sport Dili Benfica、Sporting de Timor等，由於曾經係葡萄牙殖民地，所以東帝汶一樣有賓菲加、波圖、士砵亭等葡萄牙球會嘅分會。
由於不適宜踢主客際賽事，絕大部分賽事都係放喺首都帝力嘅Dili Municipal Stadium舉行，不過可能係第一年搞職業，入場睇波嘅球迷確實唔少，有啲賽事都可以吸引四、五千人入場，場面比港超聯更熱鬧。
職業賽面世，唔少東帝汶球員都放棄正職成為職業球員，包括喺東帝汶出生嘅九十年代印尼國腳Miro Baldo Bento(賓圖)。呢位現年四十歲嘅前印尼國腳挂靴後返回東帝汶搞家族生意賣柴油，遇上職業賽成立及波圖嘅邀請而復出，賓圖喺東帝汶球壇甚有名望，佢係史上唯一一個代表過印尼及東帝汶國家隊出賽嘅球員。
當然LFA水平比泰、馬、印聯賽都低，暫時好難吸引當打嘅血統球員返去。