立即捐款

Momay

我係熱愛足球嘅油漆佬。 網誌

國際

印尼華人女歌手完成華語專輯夢

印尼華人女歌手完成華語專輯夢
廣告

廣告

蘇哈托政權倒台後,印尼華人地位陸續得到改善,華人再次喺社會各界活躍起來,雖然印尼嘅華人人口只有一千萬,喺印尼只係一個細數目,但去到邊到你都會見到百足咁多爪嘅華人身影,包括音樂界。

記得2008年我鍵咗一篇文講述一位叫Alena Wu(吳慧麗)嘅印尼華人女歌手事蹟,當時活躍喺印尼主流樂壇嘅華人歌手唔算太多,會唱華語歌嘅就更少,吳慧麗就係極少數有唱原創華語歌嘅印尼華人流行歌手。

蘇哈托執政時官方經常打壓華人文化,華文學校停辦,導致住喺大城市嘅新世代印尼華人好多都唔識講中文(華語)及方言,產生好多華番(只會講印尼話嘅印尼華人),吳慧麗就係華番代表之一。
不過華人地位得到改善後,電台開始播放台灣流行歌,中文(華語)及方言被新世代華人重視返,學習中文嘅人都多咗,但只有極少印尼華人歌手會唱華語歌,事關華語歌喺印尼依然久缺市場,所以Nagaswara唱片公司2008年為吳慧麗推出嘅專輯就以印尼語歌為主打華語歌為副,確保唔會失去印尼市場之餘又可以推廣到華語歌。

雖然吳慧麗嘅唱功被肯定,但銷情欠佳,直到今年吳慧麗先推出第三張專輯,此前一段長時間佢都係間中登台及客串拍劇、電影搵銀,但最重要呢段時間佢學識講華語,2008年推出時雖然有唱華語歌但佢當時其實唔識講華語。

第三張專輯叫<幸福>,專輯內清一色都係華語歌,由佢老公兼音樂人Popoa Fauza包辦所有曲底,歌詞由 Ruvan Lin及吳俊賢負責,題材都係圍繞家庭及愛情。記得八年前電郵畀吳慧麗問點先可以買到佢隻碟,講到一半佢就話隻碟銷量其實好差。

某程度同盜版、非法下載猖狂有關,但近年更多人願意喺iTunes畀錢買歌,數字令佢重燃希望,2014年10月佢決定推出自資推出第三張專輯,完成華語專輯夢。

接受華媒訪問時吳慧麗希望自己嘅歌會成功,可以增加知名度方便打入中港台星馬等市場,其實八年前我喺某大陸音樂討論區推廣過吳慧麗一首描述雅加達貧窮華人生活嘅華語流行歌<為你存在>,文章被轉貼多次,至今仲被轉貼緊,勉強上吳慧麗喺海外大中華圈並非毫無知名度,但華語流行樂壇唔係想象中咁易闖。

講起上網畀錢買歌,我好奇有幾多人會咁做呢?

廣告