隨住香港政治氣候愈演愈烈，六四事件變成一個複雜而爭議性的題目。對於六四我有點無從入手，但昨日有朋友轉述幾點（藍絲／中立／愛國）抨擊抗爭者，罵着「黃絲亂港」嘅理由，令我想講幾句。（所以跟住唔係講六四）只希望大家如果有幸撞到佢地都識點同佢地釐清現況。
首先係話香港冇可能唔靠中國
因為如果分開左，中國就唔會好似宜加咁提供咁多的糧食俾香港，咁到時香港只可以食其他地方進口的野，咁到時其他地方知道仲唔加價 ?咁到時香港的物價又會再高，咁到時香港肯定民不聊生……
「我其實唔係好明白呢種邏輯…首先靠中國同同佢做貿易係兩件事。舉個例香港嘅白米進口泰國、越南、中國、日本，唔會話沒咗中國唔得。講到提供糧食，唔通宜家係中國免費派糧俾我地？
香港一早係美食天堂 、國際都市 ，中國建國幾十年 ，香港已經開埠咗貿百年，一直沒乜糧食問題，香港市場一向係全球進口，商品來自唔同地方，全球貨品價格受國際監管，除非受制裁啦，否則香港唔會有糧食問題嘅。（然而香港係沒威脅全球安全情況下 都唔會需要為此擔憂，加上就算中國有不滿，其他國家都唔會由中國想點就點，首先因為香港係重要經濟交易區，而有好多外國人係度住，加上美國都唔會幫中國，又點搞咁大？）
再舉個例，我地係高價買入東江水，非免費，仲要係受高污染需要多重過濾才能正常使用，香港進口價錢比其他國家買的價格貴幾倍，到底係邊個供養邊個好明顯吧。
其實香港係海港，設立本地海水淨化廠，只係政府不願建設，拖完又避，唔想香港可以自給自足。」
之後佢地話當時佔中，根本都做唔到野，除左阻塞交通之外。香港民生根本都冇改善過，雖然可能有更多人留意新聞，著重民主，但亦都係令香港更分裂嘅原因。
同埋佢地覺得梁振英如果真係落左台，咁邊個做特首？？到時香港咪仲亂？
「有啲難幾句答到……中港合作有幾大需要，我真係好難答到，因為好多利益只係存在係政府高官同商家大集團，好多基層小市民依舊係生活艱難，好多問題一日比一日嚴重。重點係合作關係係互助合作 ，唔係好似宜家咁香港無條件配合，單程証、引入專才係偏向似以溝淡本地港人嘅手法 ，百幾萬人落哂香港，導致人口過多、社會流動低同資源不足嘅情況，最終只有害香港本地經濟民生。明顯的例子，水貨問題完全對經濟百害沒一利 ，再說近日中國經濟明顯係證明緊中國呢個不穩定經濟體係似拖累香港多啲……（雖然樓價愈跌愈開心）
沒錯 ，梁振英落台可能唔會有咩改變，慨然講得出呢句，證明都明白宜家嗰制度有問題，所以好嘅候選搞唔到上去，雨傘運動講緊就係要改變制度，有沒成效唔係淨係睇一樣嘢，法國大革都目標失敗但影響好大，呢樣沒得否認都係一種成果 。
香港嘅民不聊生、混亂係一直存在嘅問題 ， 小市民一直默默忍受同對抗政治暴力 一句「政府嘅決定」就可以合理化所有荒謬 。
問題唔係因為有雨傘運動而出現，只係好多人因雨傘運動而發現 ，不論種族、身份、職業 。
所謂嘅黃絲，只不過係一班醒悟要真正關心香港嘅人。」
我唔偏向獨立與否，始終一隻手拍唔響，呢樣要睇中國識唔識浪子回頭。
打個比如，如果有個學生讀開國際學校，學歷幾好，突然轉佢本地學校，如果間學校係好當然沒問題，但如果校長日日要你唱校歌，老師教錯書，風紀中意就拖人去暗角打，咁又點會想留低呢？