正當全球各地唔少球迷為歐洲國家盃、美洲國家盃而瘋狂時，另一邊廂大洋洲國家盃無聲無息地完結，同屬一個洲嘅足球盛事，關注度卻差天共地，迎成一種極度強烈嘅對比，主要係因為大洋洲盃競爭水平低及過分強弱懸殊，好多球迷都認為冠軍好大機會都係新西蘭，即使上屆新西蘭四強墜馬失足但依然被睇高一線，事實上新西蘭確係比較突出，但並非是是旦旦都可以踢嬴。而大洋洲盃又冇乜知名球星撐場，唔少參賽國家嘅球員都係業餘性質，賽事對全球嘅影響力又低，種種原因加埋令到大洋洲盃被全球大部分地方無視，大洋洲以外嘅地方極少球迷會關注呢個盃賽，而媒體就更加唔會對此作出報導。
但喺某些情況下大洋洲盃一樣會得到全球嘅注視，就係由非新西蘭嘅國家奪得冠軍，因為世人對大洋洲盃嘅印象就係新西蘭玩晒，好多球迷覺得新西蘭拎冠軍根本就唔係乜嘢大新聞，如果由巴布亞新幾內亞奪冠代表大洋洲出戰2017年洲際國家盃，話題自然多，因為新西蘭奪冠係一個幾乎被肯定嘅定律，當定律被打破，球迷嘅好奇心就會浮現，球迷亦會談論巴布亞新幾內亞面對世界列強會落得咩下場，就好似上屆大洋洲盃冠軍大溪地咁，只可惜決賽巴布亞新幾內亞喺十二碼大戰中不敵新西蘭。
即使大洋洲盃被世間評定為新西蘭嘅天下，強弱懸殊關係時有球迷質疑大洋洲盃存在意義，但近年新西蘭喺大洋洲盃內都唔再可以輕輕鬆鬆鄧梓峰，今年四強及決賽都贏得幾驚險尷尬，雖然呢隊新西蘭末必係以最強陣形示人，但好多半職或業餘性質嘅對手同呢隊起用全數全職嘅新西蘭隊踢起上嚟都唔輸蝕，究竟係咪真係咁強弱懸殊呢？定係差距開始收窄呢？抑或新西蘭唔需要喺大洋洲盃盡顯功架呢？睇埋出年世界盃外圍賽就會知。
但存在意義唔可以單憑水平差距去決定所有，對於喺國際冇咁活躍嘅一批大洋洲國家男足隊嚟講，大洋洲盃就係繼世界盃外圍賽後喺大洋洲內最重要嘅賽事，對呢批實力一般嘅大洋洲國家男足隊嚟講能夠參加大洋洲盃係一種認同。