體育

印尼軍足球醜聞

廣告
印尼軍足球醜聞

廣告

印尼足球錦標賽A區唯一一支冇用外援嘅球隊PS TNI(印尼軍)雖然排緊積分榜尾二,但同有外援嘅球隊踢起上嚟都唔算差,好多球隊都唔敢睇少佢哋嘅實力。印尼軍方收購Persiram Raja Ampat(佩斯雲)後以PS TNI(印尼軍)之名參加印錦賽,球隊入面大部分球員都係印尼軍人,而唔少人認為印尼軍方高調參與印尼足球嘅目的係希望利用足球改善形象,講白啲就係有政治目的。

但談何容易呢?雖然印尼軍方冇蘇哈托年代時咁有影響力,但部分人對印尼軍人嘅印象依然麻麻,主因係蘇哈托年代印尼軍人做過太多衰嘢,而PS TNI(印尼軍)參加印錦賽後,呢種球迷對印尼軍人反感嘅情緒就完全顯露喺球賽內,好似上個月Gresik United(錦石聯)主場對印尼軍,有錦石聯球迷掛起「軍人請停止傲慢」嘅挑釁性Banner,並高喊「軍人是殺人兇器」、「獨裁者的刀」等有骨說話(都係實話),更有錦石聯球迷試圖搶奪印尼軍嘅Banner,引發百多位印尼軍球迷追打錦石聯球迷,最終有五十一位球迷入廠,部分人骨折。

雖然「撩人者賤。打死無怨 」,但係印尼軍球迷其實九成九都係現役軍人,所以根本就係軍人打平民,事件令印尼軍方好尷尬,形象進一步插水,雖然軍方有道歉及承諾會管教班''球迷'',但多次指錦石聯球迷向印尼軍球迷掟石先係導火線,不過有錦石聯球迷堅稱老屈,真相係點只有現場嗰萬幾球迷先知喇。

最終印尼軍被罰錢及被禁止有關球迷去現場睇嚟緊嘅兩場波,錦石聯都要罰錢,即使大家都有錯,但可以睇得出印尼軍人喺印尼社會都唔係咁受認同,始終以往印尼好多種族、政治屠殺事件都係同軍人有關,加上印尼軍人畀人感覺有種傲慢及野蠻,好似上年一名軍人行車時同一個平民電單車司機發生糾紛最後當場射殺對方嘅事件引起社會轟動,呢類事件令到軍人喺印尼形象持續低落,想利用足球改善形象?分分鐘衰多兩錢重。

廣告