大洋洲國家盃雖然近乎無聲無息下完結，但相信有收睇及關注此大洋洲足球盛事嘅球迷都會對東道主巴布亞新幾內亞球員嘅表現留下深刻印象，特別係總決賽中令擁有眾多職業外流球員嘅新西蘭吃盡苦頭。
今次巴布亞新幾內亞國家隊嘅丹麥籍教練Flemming Serritslev主要揀選嘅球員都係來自Hekari United(希卡利聯)及Lae City Dwellers(萊城)兩間巴布亞新幾內亞半職球會，只有一位有德國血統嘅前中後場都踢得嘅球員Alwin Komolong(卡米龍)喺美國讀書兼踢大學聯賽，但嚴格上卡米龍都唔算外流球員。
講到喺海外踢波嘅巴布亞新幾內亞球員其實都有唔少，主要集中喺澳洲，但大部分都係踢業餘聯賽，上年巴布亞新幾內亞公佈集訓名單時有球員就來自澳洲、新西蘭、荷蘭甚至香港嘅球會，我相信冇乜幾多香港球迷知道香港聯賽有球員入選過巴布亞新幾內亞大洋洲國家盃集訓名單，上年瀏覽巴布亞新幾內亞一個官方足球網站時睇見名單中有球員來自香港聯賽我都仲係半信半疑，經反覆人肉搜尋後，確認香港聯賽的確有呢位球員，佢就係1984年喺澳洲出生，司職中場嘅Brendan Beni(比尼 )。
比尼來港前喺澳洲半職業聯賽National Premier Leagues Victoria(維多利亞超級聯賽)踢過一段時間，效力過嘅包括Sunshine George Cross FC及Hume City FC等球會，2012年來港工作兼以兼職身分效力當時踢香港乙組聯賽嘅港會，大部分時間都係球隊正選，令人較有印象可能係2014年香港足總盃代表過港會對傑志，12-13至15-16賽季一共為港會射入四球，今季已經冇跟港會踢甲組，但有喺一個叫友誼聯賽(Yau Yee Football League)嘅業餘足球聯賽入面出現，佢踢緊嘅Club Wanderers其實都係港會搞嘅業餘球隊。
比尼會出現喺巴布亞新幾內亞大洋洲國家盃集訓名單中，全因佢身上有巴布亞新幾內亞血統，翻查資料佢未代表過巴布亞新幾內亞，亦冇出席過集訓，但入選集訓名單嘅球員從來不代表一定有資格代表國家隊，不過比尼絕對有呢個代表資格，只係佢有權選擇唔理呢份集訓名單。