體育

印尼足球流氓都有假的?

廣告
印尼足球流氓都有假的?

廣告

近排歐國盃引發嘅各類足球流氓事件廣受全球關注,其實足球流氓呢一樣嘢都唔淨止係歐洲面對嘅問題,南美、北美、非洲、亞洲各地都面對緊呢一樣嘢,好似亞洲嘅東南亞入面有好多國家嘅人民都係為足球而瘋狂,某些國家有自己特色嘅打吡大戰,由於積累多年嘅仇恨,每到對碰前雙方球迷都會先喺街頭開戰,往往造成破壞及傷亡事故,產生所謂足球流氓,印尼應該都係東南亞入面有最多足球流氓嘅國家。

講到印尼最著名嘅足球打吡大戰一定係西爪哇打吡,即係 Persija Jakarta(佩斯查) 對 Persib Bandung(佩斯比) ,Persija Jakarta(佩斯查) 係雅加達市球隊,而Persib Bandung(佩斯比)係萬隆市球隊,由於呢兩個城市都係印尼最重要及最有影響力嘅城市,所以雙方球迷多年以來都鐘意互相比較,講白啲就係互相認叻及互相睇唔起大家,因此雙方球迷成日未開波先開片,由1930年起打下打下就打到去今日,成為亞洲球壇最火爆嘅足球打吡之一。

每次西爪哇打吡到來前維護治安嘅警察永遠會成為社會焦點,警察更試過因而打死過球迷,警察嘅做法往往會被與警察關係一般嘅政客及組織攻擊與針對,或有人會借事件去打擊兩地市長之地位,賽事往往會政治化,基本上西爪哇打吡已經唔淨止係一場足球賽,甚至經常有傳有政客派出專人假扮球迷生事意圖借西爪哇打吡穩固自己政治地位,例如2013年萬隆隊作客雅加達,職球員乘車前往雅加達中途被神祕笠頭黨截車襲擊,笠頭黨更嘗試放火燒死車上萬隆隊職球員,幸好司機踩油瘋狂倒車逃離現場,事件發生後有萬隆隊高層指相信並非一般足球流氓所做,手法更似殺手,而最怪係護送車隊嘅警車喺護送中途忽然消失,令事件撲朔迷離。

其實近年雙方開始有啲冇咁極端嘅球迷組織會結盟互相示好,希望以行動證明雙方都可以和平共處,但得唔到幾多認同及重視,更可悲係主流社會經常將當地嘅Ultras 組織同一般足球流氓聯結一起,雖然某些 Ultras 組織被指涉及暴力事件,但更多 Ultras 組織只會將精神投放喺球隊身上。

同唔少歐洲足球流氓一樣,雙方部分所謂球迷更重視「消滅」敵方球迷多於專注於足球賽事,場波打成點未必係佢哋嘅重點,呢批所謂球迷究竟係咪球迷,我都唔知道,只知道呢幾年西爪哇打吡大賽都悶到爆炸,如果我係第一次睇印尼波又睇著前年嘅打吡大賽,我可能會比場波嘅水平嚇到冇下次。

廣告