依個問題我諗咗成晚。
警察起薪點$21,410，消防起薪點$18,895，當中差唔多有三千蚊差距。如果你話一分錢一分貨嘅話，一係警察要求好高，一係佢地做嘅嘢好危險，但結果係調轉。
其他地方警察幾危險我唔知，香港警察大部份時間做嘅嘢仲舒服過我樓下看更：行下咇，上一樓一扮放蛇叫免費雞，食LUNCH喺茶記食飯玩下電話，放工又搵機會玩下人妻。你問我當差最大風險係咩？除左性病我諗唔到。
當然，佢地大時大節都好多嘢做，企下街封下路，最多答下問路嘅市民咁樣（不過只限廣東話囉），OT完仲有特別補水。你話佔中佔旺果陣好危險？班示威者扔嘅係土製炸彈定汽油彈，武器用鐵通定棒球棍啊？班警察又死咗幾多件？自己一邊開槍一邊放催淚彈，一邊話自己好危險，真係辛苦哂你。係啊，依幾年KEEP住有警察死，但好似都係爛賭借完冇錢還自殺咁囉，對上一個因公事死嘅係咪除步高殺果個？仲要係自己人殺自己人啊陰公。
記得上年車房爆炸，有一堆藍衫高薪英勇為市民服務不畏懼願冒生命危險嘅警察第一時間就抱頭叫啊媽咁走，淨返個消防自己過去。警察遇到咩事可以走，但消防見到火災爆炸就一定要衝，揹住一大堆裝備，著件焗得死人嘅衫衝入最危險嘅地方救人。冇錯好多消防都係藍絲，但佢地唔會知你唔係藍絲而扔低你唔救，更加唔會拖你去打一鑊金，所以理念唔同都好，消防仍然值得尊重，佢地係小數我覺得配得上人民公僕嘅政府機構。
消防體能要求極高，每次出任務都有可能搵命博，坐喺路邊爬完飯又要準備入火場，有邊一點係頂住個大肚腩嘅差佬比得上？佢地有咩資格過高人工過消防，佢地連學七警出半糧都冇資格。兩日兩條人命，消防受咁大打擊仲喺現場為市民博緊命，而唔係好似警察一味當市民仇人咁永遠企我地對立面。
知唔知依三千蚊代表咩？代表政府唔尊重消防，唔尊重人命，或者我應該講政府冇尊重過我地。殺人防火金腰帶，修橋補路冇屍骸，用嚟形容警察同消防，貼切不過。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材。