體育

只跟主流聲音做人,印尼足球永遠喺你心內只有一種形象。

廣告
只跟主流聲音做人,印尼足球永遠喺你心內只有一種形象。

廣告

琴晚印錦賽發生騷亂,場波我都有睇直播,所以今日都有講下,有網友就問:「點解歐國盃騷亂咁多人講但印尼聯騷亂就冇乜人理」?

呢個問題好易答,因為歐國盃係世界盛事,而印尼足球於世界上幾乎毫無影響力,所以一切都會被世界上大部分人無視,理得你球迷騷亂有幾大鑊,傷幾多死幾多人都係三個字WFC,如果印尼足球聯賽同英超德甲一樣咁多全球各地支持者,琴晚呢單嘢晨早洗咗FB版啦,但現實唔係呀嘛,唔係咪WFC囉。

不過諗諗下又唔係嘅,間唔中國際知名媒體都會報導有關印尼足球嘅消息,大中華地區媒體見到都會翻譯轉報,都未算係WFC,但都係衰嘢(負面)居多,例如踢死人、打死人、病死人、踩死人、冇糧出、打假波、打假波、打假波、打假波同打假波等,乜印尼足球冇好嘢同正面嘢嗎?有,大把啦,但可能唔夠爆炸,可能覺得印尼足球嘅好事正面嘢邊會有人想睇,所以不論幾熱血幾賺人熱淚,國際知名媒體根本都冇興趣去報導,國際知名媒體冇報導,跟外電做人嘅某些大中華地區媒體就更加唔會報導,所以你唔去自動波睇印尼主流及非主流媒體講乜,根本就唔知印尼足球壇真面目係點,如果只睇部分國際知名主流媒體同大中華地區主流媒體報導嘅印尼足球消息,只會跟隨主流聲音做人佢話乜你做乜而冇諗呢啲嘢係咪等於所有,你就可能對印尼足球只有一種印象,就係柒。

但柒事喺印尼足球壇卻真係比好事多,呢個係不爭嘅事實,亦都係印尼足球未能更上一層樓嘅原因,有時甚至因為發生得多被無視及忽略,例如球迷騷亂,基本上喺印尼每年都有,甚至有球迷因此死亡都末必會引起什麼大討論,因為可能對此大家已經麻木晒,當一件負面事被國際知名媒體大肆報導,但喺印尼圍內對此事態度卻係相反,其實更為可怕。

廣告