今年管理印尼足球錦標賽嘅賽會PT GTS對球隊財政有非常嚴格嘅管理，咁做係要杜絕經常無糧出嘅情況，以保障職球員生活。因為環境得到些微改善，唔少失蹤球員都重返職業賽場，但有啲本身可以踢多幾年先收山嘅球員就選擇繼續遠離球場去尋找自己嘅道路，就好似前國腳 Wahyu Wijiastanto咁。
司職中堅嘅 Wahyu Wijiastanto(韋積斯圖)今年三十歲，身高有成193CM，喺印尼嚟講都算罕見，所以被某啲球迷稱為「印尼巨人」，而正正因為身高成為佢初出道就被多方關注嘅原因，二十歲時正式踏入職業賽場效力中爪哇細會 Persijap Jepara(佩斯查柏)，上陣機會唔算少，但表現不似預期，雖然應付高波綽綽有餘，但動作比較生硬，經常因為咁令後防險象環生，同多方嘅寄望有差落，加上佢又唔係特別出眾得個高字，所以好快韋積斯圖呢個名就極少出現喺媒體報導當中。
2009年韋積斯圖轉投次級聯賽球隊 Persiba Bantul(佩斯巴)後成為球隊隊長及隊中重要人物，一年比一年穩健、進步嘅演出令韋積斯圖成為次級聯賽最優秀嘅後防球員之一，但由於只係次級聯賽關注度比較低，韋積斯圖要等到佩斯巴升班先被球壇重新關注，亦因此喺2011年入選印尼國家足球隊終極大軍名單，仲踢過兩場2014年世界盃外圍賽賽事，但表現就好一般喇。本來都諗住冇下次，但遇著聯賽鬧雙胞事件，大部分當打球員都喺非官方聯賽踢波無法入選印尼國家足球隊，所以踢緊官方聯賽嘅韋積斯圖就喺2012年 - 2014年間代表印尼踢過十場國際賽。
上年印尼聯賽被叫停令到韋積斯圖意識到喺印尼做職業球員都未必穩陣，所以今年謝絕三支球隊邀請，自已創業，睇中觀賞魚有市場出口外地之餘仲養埋食用魚賣，例如鯰魚、非洲鯽魚，結果利潤豐厚，兩個星期就最少有1000萬盧比收入。雖然養魚好搵，但競爭非常大，所以佢仲賣埋雀，例如愛情鳥。
韋積斯圖：「一些球員有足球之外的另一份工作，為什麼會這樣？因為在印尼踢足球沒有保障。」(Bola.net) 其實亞洲好多地方同樣遇上呢個問題，就係球員冇足夠保障。