政經

幫父母睇強積金,諗起就嬲

廣告
幫父母睇強積金,諗起就嬲

廣告

【諗起就嬲】喺強積金每年 Keep 住蝕,我睇完堆投資基金組合之後發現蝕嘅係兩隻成份基金,決定將個 % 轉晒入一隻比較穩陣嘅低回報低風險基金入面,唔求賺只求燒得慢之後,我忽然醒起兩老應該都有呢個問題。

於是我問兩老,你地份強積金記錄呢?兩老答我,冇啊,我地一直冇睇。一來有時成份係雞腸,二來有時幾十頁,又一堆數字咁,邊睇得明?

我再問,咁你有冇問過負責你地個戶口嗰個人?兩老話:其實每日返完工/做完家務都冇咩時間,星期六日銀行又唔開,又冇人教過我地呢啲,都唔知點搞好。所以就一路都冇理喇。

我:咁好啦,我幫你地搞。

兩老係工人階級,最底層嗰種。冇咩學歷,嚴格黎講係連中學都冇讀過。但錢就真係一日一日辛苦用汗水搵返嚟。強積金背後嘅自主理財觀念,係預設咗幾多嘅知識同時間資本?我相信兩老唔係特例,香港社會仲有大量相同嘅個案。一世人辛辛苦苦打工,喺人工度每年要扣嚟供,仲要每年蝕。

我有時真係唔明,坐喺上面諗呢堆強積金政策嘅人,係唔係以為全香港所有人都係大學畢業,坐辦公室,好識得自我理財,會日日打開個 online banking acct 去睇實自己堆投資嘅回報率繼而作出合理嘅調整?

係唔係一句管理好自己退休投資係個人責任,就唔需要理會呢種「自我管理」背後需要預設嘅條件?你點令一班工人階級,對科技數字完全唔熟悉嘅人,突然之間自己會變到好識管理自己堆投資?呢度需要幾大嘅社會配套?

一諗到呢度我就覺得好不知所謂。垃圾香港政府。

廣告