立即捐款

Momay

我係熱愛足球嘅油漆佬。 網誌

體育

東南亞U16青年足球錦標賽政治化

東南亞U16青年足球錦標賽政治化
廣告

廣告

今屆東南亞U16青年足球錦標賽由柬埔寨做東,成為近年最火爆嘅一屆,除咗「柬埔寨足球熱」成功吸引大量球迷入場外,南海爭議亦捲入賽事內,令賽事政治化。

半決賽由柬埔寨U16對住越南U16,本來應該相安無事,但係由於近排柬埔寨首相洪森喺東盟成員國同中國喺南海爭議中傾向支持中國,柬埔寨成為部分越南球迷眼中釘,所以賽事末踢雙方球迷已經喺網上開戰,越南球迷就批評柬埔寨係中國養嘅一隻狗。而越南當年出軍消滅紅色高棉間接幫助柬埔寨人免受痛苦,部分柬埔寨人確實感謝越南人間接拯救,所以球場內都有柬埔寨球迷為柬埔寨義務打氣同時揮舞越南國旗以示感謝,但有更多柬埔寨球迷認為柬埔寨人只會支持柬埔寨冇必要支持客軍,此舉又令部分越南球迷不滿批評柬埔寨人忘恩負義,而部分柬埔寨球迷就反擊指越南係有目的先會發動入侵戰,並非誠心拯救柬埔寨,所以根本冇咩「忘恩負義」存在,南海事件上洪森傾向支持中國亦唔係代表一般國民都持呢種諗法,唔應該以南海爭議去尖對柬埔寨球員及球迷,大家為此互相攻擊。

最終越南U16一比零險勝柬埔寨U16入決賽,當日有柬埔寨人為越南打氣,但更多球迷係向越南U16柴台,令部分越南球迷更加不滿,到總決賽越南U16對住澳洲U16時有柬埔寨球迷故意支持澳洲U16「反擊」班越南球迷,場內幾十個因為當年歷史而支持越南U16嘅柬埔寨球迷之打氣聲被大量球迷向越南U16發出嘅噓聲掩蓋,現場就如澳洲U16主場一樣。最終互射十二碼越南U16輸波,好多柬埔寨球迷都非常開心,當然唔係為澳洲U16而歡呼,係因為睇住越南U16輸波。

場波雖然完咗,但現時兩國網軍仲喺到打緊,班球員踢成點似乎冇乜人理,菲律賓U16包尾出局變得毫不重要。越南U16年紀輕輕就要背上沉重政治包袱,雖然話足球離不開政治,但對年青球員嚟講係咪一件壞事呢?

廣告