就嚟七月十四，一講到鬼好多人都表示驚驚豬又話要忌呢忌路，香港人信科學多乜都話幻覺，但印尼佬就表示見到慣冇咩好驚，就算入場睇波都成日見到一種叫''Pocong''嘅鬼怪，呢種鬼怪更似中國殭屍都係跳下跳咁郁，相傳印尼、馬拉有伊斯蘭信仰之人死後必須包覆喺白色裹屍布入面為期四十日，靈魂至會得到自由。但四十日後白色裹屍布冇被解開冇被打開，屍體就會喺墳墓裡跳出變成''Pocong''。
但呢種咁可怕嘅鬼怪文化已經融入印尼主流社會內，唔少電視劇、電影都以''Pocong''為題材，球場內都好常見，當然球場內嘅''Pocong''都係人扮出嚟，究竟''Pocong''係咪真正存在成謎，但似乎唔緊要，''Pocong''喺球場內嘅位置唔係詭異及驚嚇，而係開心，''Pocong''會變成開心嘅標誌，全賴電視劇、電影嘅影響，有唔少以''Pocong''為題嘅電視劇、電影都係喜劇，搞笑多過驚嚇，唔少人一諗起而''Pocong''笑多過驚，而''Pocong''出現於球場內亦係向球迷提醒要暫時放低生活上嘅煩惱開心享受比賽。講真，呢方面印尼的確好放，而我哋香港球迷投入程度唔會差過印尼佬，但就係冇印尼佬咁放，好多香港球迷入場後個腦仲係冇離開學校同公司，都仲係離不開嗰種緊張氣氛。
印尼球場內嘅''Pocong''有趣多過驚嚇，但我成日覺得因為燈光及畫面差令到某些球迷相貌變得更詭異及驚嚇過''Pocong''，我睇直播時見過得個頭嘅球迷，不過畫面咁差人都可以睇錯變鬼啦。