朱米高

傳媒人,基督徒,曼聯迷,識少少音樂 網誌

政經

由一幅相講起

由一幅相講起
廣告

廣告

是咁的,早兩日喺網上見到一幅相(如圖),圖中圈住兩個主角:本民前嘅梁天琦同社民連嘅吳文遠。咁張相想表達乜?好明顯,就係梁天琦係傳媒焦點,而吳文遠就無人問津。

雖然我唔喺現場,不過根據我嘅常識同睇返各電視台嘅新聞片,其實梁、吳二人係輪流接受記者訪問,咁其中一個俾記者圍,另一個梗係喺側邊等。好難話邊個紅過邊個,要影一張相反效果嘅相應該易如反掌。

張相之所以俾人流傳,好肯定,係相片嘅內容講中咗你心入面嘅立場/感覺。
好,入正題,原來我都係想講Pokemon Go。

有人傳出發自基督徒嘅短訊,指玩Pokemon Go涉及靈界甚至直指邪靈。我反而比較想研究下,點解呢個信息會被流傳?

我會覺得,其實係某些人,本身就相信打機或者某些成癮嘅惡習,係涉及靈界力量,所以當網上有一d相近嘅信息傳咗出嚟,佢就會放低懷疑之心,去相信、去流傳。

如果Pokemon Go真係涉及邪靈,呢個係一個非常嚴重嘅指控。指控越嚴重,越需要真憑實據去支持。

但當人嘅主觀意願得到認同,人就無咁講究證據是否足夠,因為該說法,符合咗自己一向嘅想法。

不過,我地亦唔應該嘲笑呢類人,因為同樣係Pokemon Go,其實反對「邪靈論」嘅一群亦做咗差唔多嘅事。

話說以勒基金一段對Pokemon Go持靈界論嘅禱文刊登咗,好快俾反對者轉載,心痛嘅心痛,嘲諷嘅嘲諷。

但事後,有人質疑篇禱文嘅真確性,因為格式同以勒基金一向嘅有分別,而且佢地官網亦無登出該禱文。起碼到而家,仲未可以肯定真定假。

不過,由於篇文符合某些人心目一直以來覺得以勒基金係膠嘅印象,所以就照單全收。

我又想起不久前一張基督教聚會嘅poster亦被廣泛流傳,內容係一個「驅走佔中的靈」嘅活動,主領者係一班被視為親建制嘅牧師同基督徒藝人。然後,當後知道係假嘢。

我地都太鍾意太鍾意轉發符合自己一向想法嘅信息,鍾意到忘記咗起碼嘅求証過程。

廣告