體育

【印錦賽】 印尼足壇孖生兄弟球員際遇有幾唔同?

廣告
【印錦賽】 印尼足壇孖生兄弟球員際遇有幾唔同?

廣告

上週舉行嘅第十三輪印尼足球A級錦標賽,其中一場萬隆對佩西拉嘅賽事,表面上睇係一場強弱懸殊嘅賽事,甚至入場人數只有接近一萬,對於號召力比較強嘅萬隆隊嚟講呢個入場數字算係失敗,但唔代表賽事就冇睇頭,最少有一對印尼足壇孖生兄弟都係效力呢兩隊波,球迷們都想欣賞親兄弟互片,呢對孖生兄弟一個叫Zulvin Zamrun(阿哥),另一個叫Zulham Zamrun(細佬),大家都係踼翼鋒,大家都係叫 Zamrun(森雲),大家都係一齊出道加盟同一支職業隊,只不過現時大家差別就愈嚟愈大。

講返場波先,要到下半場萬隆隊先換入Zulham Zamrun(細佬),每當呢對孖生兄弟正面交鋒時球迷都會特別興奮,雖然係孖生,但攔截對方時都毫不客氣出收山腳試圖將對方收皮,落到場兄弟都冇面畀,甚至發生輕微推撞,不過最終大家都相安無事,完場後仲交換波衫,Zulvin Zamrun(大佬)效力嘅佩西拉喪失三分,賽後記招講笑咁話:下一輪我們主場,我必定報仇。

雖然森雲兄弟係現時印尼足壇最出名嘅孖生兄弟球員,但大佬其實一直被媒體及球迷無視,呢對孖生兄弟2005年一同加盟家鄉Ternate(德那第)球隊Persiter Ternate,但天資問題細佬比大佬搶鏡得多,好快細佬就畀家鄉外嘅球隊睇中,大家各走各路,結果細佬嘅表現引來更多注視,甚至入選埋國家隊,但大佬卻繼續留喺家鄉冇乜人識。好彩嘅係去到2012年,超級聯賽球隊Persiba Balikpapan(佩斯巴)對大佬有興趣,最後都順利簽約首登頂級聯賽,不過由於嗰名、身型、相貌同髮型都接近,好多唔清楚森雲兄弟背景嘅球迷都誤以為另一個喺頂級聯賽一早起朵嘅森雲加盟,但最後都明白原來森雲有個孖生阿哥又係叫森雲又係踢波,當然,資質關係,佢係球隊表現都係普普通通。

2014年,受細佬推介,大佬加盟Mitra Kukar(米特拉),兩兄弟有機會拍住上,不過嗰一季細佬依然係主角,大佬有時冷板都冇得坐。不過去到2015年尾嘅總統盃,兩兄弟又分開效力兩支球隊,大佬加盟婆羅洲FC,細佬加盟萬隆,雖然有傳婆羅洲FC都有一定財力,但相傳一對孖生兄弟嘅人工都差幾遠,當然係比較好波嘅細佬比較高。而盃賽進行時兩隊巧合碰面,一對孖生兄弟終於有機會過招,雖然位置問題甚少一對一,但最終大佬踢緊嘅婆羅洲FC輸波,又一次輸畀細佬,完場後大佬只能用喊去發洩情緒。

某啲熱愛網上評波嘅印尼球迷甚至記者就好鐘意好似我上面咁講,不停將對孖生兄弟作比較,覺得大佬幾乎乜都輸畀細佬,鐘意強調大佬比細佬弱,又話冇細佬大佬只會寂寂無名,講到喺阿媽個閪到首先必出嚟嘅就應該醒啲威啲咁,其實持呢種思想做人都幾畸型,踢波呢啲都係講天質,孖生兄弟又點,細佬勁過大佬好出奇咩?細佬有人氣而令球迷認識埋大佬又點呢?而呢對孖生兄弟球員我都算睇得多,細佬又真係勁過大佬,大佬速度都幾快,但其他都係普普通通,想唔輸都唔得啦!如果畀我係大佬都真係冇乜所謂,有個咁勁嘅細佬開心至係,人哋點睇真係理唔到太多。

廣告