立即捐款

社運

2016,我們還要跟大隊的政治嗎?——如果你不是保守選民,就無謂投楊岳橋啦

2016,我們還要跟大隊的政治嗎?——如果你不是保守選民,就無謂投楊岳橋啦
廣告

廣告

0. 晨早流流,見到有朋友諗緊投唔投楊岳橋,心裡十分十分不是味兒。我覺得其實如果冇咩事幹,真係冇咩必要再支持公民黨了,而且係天琦 BB 話齋,the answer is a resounding no。但唔係因為楊岳橋民調高,投佢會 side 左啲票,亦唔係因為朱凱廸參選,而係 CP 一直以來,都是demonstrate 緊一種浮滑的反對態度,其實係十分之反政治。二月新東補選,和很多朋友一樣,也力推 Alvin,雖然當時已說明,有咩唔鍾意,9月再懲罰 CP 都未遲,因為要保住分組點票的第18席。但半年過去,CP只有令人更更更失望。不是想撩事鬥非,以下我極簡單咁整理一下CP呢幾年有幾離譜,同埋根本沒有改善跡象,換人只係 young左,唔係 progressive 左。

1. CP 贊成修改議事規則(除吳靄儀外),為立法會委員會主席擴權,令建制派剪布更方便,拉布抗爭難左好多。梁家傑事後推說當時民意係咁,我心諗,你有沒有去做民調呀,你有沒有做街站解釋俾巿民聽吳靄儀的理據呀,你的政治決定有沒有價值底線呀。

2. 港珠澳大橋環評司法覆核案,正審贏左,朱女士和公民黨都即時備受壓力,但公民黨唔係選擇保護朱女士,而係選擇撇清,講到自己「被動接官司」。去到2015年夏天梁家傑接受王雅雋訪問,更直言「如果有什麼可以做得更好,或許就是寧可不要接這單案件吧」。先不論當年黃鶴鳴和黎廣德的參與是否「被動」,不如先講清楚港珠澳大橋係咩先?港珠澳大橋唔駛做研究都知道係宇宙級難度的浮跨工程啦,政府想招標搞BOT都冇財團理會政府,本身就應該反對。結果係點呢?結果就係朱婆婆受盡千夫所指之後,放棄左再上訴落去,亦即係部分關鍵的判決,例如對「基線評估」的法定要求,係遺留左落黎成為重要的案例,影響以後就環評的司法覆核。呢件事好清楚兩點︰CP 一俾人屌就劃清界線,出賣朱女士。同時對跨境基建的立場根本從來冇承擔,一直都係人云亦云。事實上,港珠澳撥款,佢地直至2015年,次次都是 yes man 啦。

3. 2012年選舉,有三區係反對派票數贏曬但輸席位,其中九東是激進派分裂,黃洋達和陶君行水溝油,難免攬炒。但另外有兩區或者是相對可以避免的,但公民黨選擇了損人不利己的「策略」。港島,陳家洛名單第一位,陳淑莊第二,新西,郭家麒第一,余若薇第二,都是想每區兩席入局。每區兩席就分名單啦,擺明 side 票啦。當時已經係「鑽石名單」失敗後8年,全港就只有公民黨咁做。呢啲叫咩呢,呢啲叫綁架,利用選民想陳淑莊和余若薇入局的熱情,吸取大量游離票。這不是成王敗寇呀,就算贏左都係應該屌啦。何況輸左,間接保送王國興,及民建聯新西三席入局。當然公民黨不是失利的唯一原因,但咁樣選舉,其實真係好 arrogant。

4. 另一次綁架事件就係今年的新東補選。湯家驊貌合神離左好耐啦,中途辭職黎講,就算公民黨內部不是一早知,也是一早知有這個機會。結果就真係發生,然後把分組點票的第18席拿去賭。好彩鄉事和自由黨唔多支持阿鼎,否則真係輸左的話,就唔係輸左個議席,而係隨時輸左個議事規則,輸左一條議會抗爭的路線。這種豪賭,相信 partially 係覺得補選正好可以幫楊岳橋宣傳(新東補選正係佢如今民調咁高的其中一個原因),但更深層的原因,相信和 2012 的選舉一樣,係托大。心諗點會輸丫,點知半路就殺個梁天琦出黎。(所以2月覺得委屈投左CP的朋友,今次冇理由再俾飛佢。)

5. 高鐵追加撥款後一週,當陳鑑林亂鳩咁剪布的爭議還未平息之際,「基本工程基金」撥款申請竟然輕易通過了。「基本工程基金」是綑綁式表決,內容包括一些無爭議性項目,但亦包括新界東北古洞老人院新院舍的賠償及工程,亦包括因為受壓於鄉事,結果棄用棕土、寧願逼遷三條非原居民鄉落的橫州計劃。表決結果是33比3,反對三票包括范國威和人力兩位。贊成的33票當中,除了民主黨,還有新晉的政治明星,楊岳橋議員。

6. 在沒有人注意、冇約束力的立法會大會議員議案中,CP 亦兩度支持發展大嶼山。

7. 張德江來港,接見泛民。梁家傑竟然說,「是中央首次正式承認泛民的憲制地位」。但代價呢,其實是泛民正式承認北京統治的合法性。同埋做咩要打梁振英小報告呢,關北京咩事呢?有真普選咪可以叫CY收皮囉。點解會番番轉頭?定係一直以來,CP 或其他會見張德江的飯盒會成員,都不是真係相信香港必須有真普選?佔領冇「結果」,係政治實力不足,咁就去培養反對派的政治實力啦,見張德江或向佢投訴把鬼咩。

8. 太多例子說明,媒體關注的時刻 CP 才會企硬,冇媒體關注的,CP 根本就冇立場,跟大隊。對方用輿論狙擊你?即縮沙啦,「民意」不可逆丫嘛。OK,香港議會也應有議員反映保守巿民意見的。所以如果你覺得你都保守,咁就支持佢地啦。但這種議員,無需要太多吧。

9. 我接觸過的人之中,譚文豪是 super nice guy,十分討好,精明、貼地、勤力、仔細、專業、有耐性,楊議員又友善又有大局觀。沒有接觸過的人之中,Tanya 給我的感覺一直超級好,毛小姐亦無咩問題呀。所以這段筆記不是針對任何個人,而是問緊,我地想議會要有點樣的政治,我地想香港要有點樣的未來。或者咁講,無須講到咁死,我也期待 CP 將來更好更開放啦,但今日,我真心覺得政治意識上,每區都有更好的選擇。

廣告