對於香港人嚟講，香港喺奧運仲有獎牌希望，最少我哋仲有牛下車神嘛！但對圖瓦盧人嚟講，今屆圖瓦盧奧運之路就此完結。呢個地勢極低，人口一萬嘅南太平洋島國只有一位運動員參加今屆奧運，佢就係Etimoni Timuani(天梅阿里)，參加嘅項目係男子田徑一百米，最終喺預賽中出局。
不過阿里仲有另一身分，就係圖瓦盧國家足球隊嘅隊員，呢位圖瓦盧國腳可以踢好多個位置，代表過圖瓦盧國家足球隊參加2011年太平洋運動會足球賽，當時佢係踢中堅，曾經於迫和關島一戰上出任正選中堅並成為國家隊喺嗰場賽事中不敗嘅最大功臣。不過由於圖瓦盧並非FIFA成員，喺大洋洲足協內亦唔活躍，冇乜發展機會下阿里就轉型玩田徑，但因為熱愛足球，有一段時間依然兼踢本地業餘聯賽。
最近一篇報導話阿里係今屆奧運村入面最孤單嘅人，因為圖瓦盧代表團只有佢一人，所以佢只能獨自一個坐喺餐廳食嘢。不過阿里就話呢啲好濕碎，最緊要係可以代表圖瓦盧出戰，即使冇人睇好佢會喺預賽出線，最少佢嘅參加都會令世人知道圖瓦盧並非孤身作戰。
全球氣候變遷，圖瓦盧因為海平面上升面臨滅國危機，亦因為咁被國際關注，不過似乎改變唔到呢個現實。