政經

港版反右運動與教育界的Inconvenient Truth

廣告
港版反右運動與教育界的Inconvenient Truth

廣告

校董組織、梁振英、吳克儉、西環不斷吹風恐嚇教育界,佢地當然唔會亦唔駛真係因為政治理由取消教師嘅註冊資格。而家佢地只係營造一個「港獨歪風入侵校園」嘅假象,呢個假象好可能係地位不穩嘅黨政領導證明自己存在價值嘅方法。

「港獨歪風」唔駛真係出現,而係可以好似反右運動咁製造出嚟,就好似雨傘期間,啲學校會怕啲大媽去門口抗議,所以會好小心行事。至於教師,見到風聲鶴唳,年輕嘅好多仲想續約或轉長工,咁就會自然小心,須知道學校只要對佢地有少少懷疑,分分鐘就唔續約。就算你係長工,如果你仲想有得發展,其實你都唔會太敢表達自己嘅政見。如果你個人比較敢言,個名響Google搵得到,你基本上好難去第二間學校,因為啲學校考慮請你之前,大部份都會Google下你個名,所以其實教育界同大部份行業都一樣,唔係太多人會太多發表政見。比較敢言嘅,通常都係豁咗出去嘅人。

如無意外,西環相關組織會搵批鬥對象,例如教協、進師盟、被莫須有嘅學校、比較高調嘅學生。如果真係去到呢一步,所有教育界人士必須記得一個原則,係學校係一個政治中立嘅地方,中立係指校方同教師,而學生嘅言論自由同政治取向自由係受《基本法》保障嘅基本人權。呢樣嘢唔理個學生同唔同意《基本法》邊一條,佢都係受《基本法》保障。如果有外人要侵犯學生嘅合法權益,教師絕對有責任保護學生,讓佢地能夠免於恐懼地學習同生活。教師有權唔同意學生嘅政治立場,但一定有責任保護學生合法權利,呢個係教育專業嘅基本原則。

仲有,當有人想搞香港反右運動嘅時候,教協呢個最大教師工會嘅角色都好重要,畢竟教協有一定嘅政治能量,仲能夠響呢種風潮之中企硬,頂住部份白色恐怖。呢個係我作為會員對現屆教協朋友嘅期望。

廣告