圖：學生動源 Studentlocalism Facebook Page
到底學校裡面可唔可以講政治？我覺得係無絕對答案嘅。
特首同特區政府會話畀你知唔可以，不過說穿了，其實佢地嘅意思係只可以講政治正確嘅政治。
咁乜嘢係政治正確呢？唔同地方就會有唔同標準。舉個例，喺美國，你鬧共產黨梗係政治正確啦；但係去到北韓，同一番說話，足以令你被人拉去犬決。總之，政治正確呢家嘢係無絕對答案嘅。
咁樣，你話講港獨政治正確D，定係歌頌一個世界歷史上殺人最多嘅政權政治正確D？政府會話你知係後者，但佢梗係唔會提殺人果部份，更加唔會話你知佢講緊政治啦，佢只會用另一個說法去包裝，例如話講港獨違反基本法（講多第一億零一次，基本法係針對政府，市民係無可能違反基本法），係毒害孩子（張德江嘅講法），而中共就係進步、無私、團結嘅集團，見到國旗升起要流淚等等。
而家個問題係：一間學校，乜嘢講得同唔講得，全由政權定生死，但係呢個政權係完全無民意授權，佢純粹以佢自己嘅利益去決定邊種論述、乜嘢角度、點樣剪裁嘅政治內容可以入學校。
總之，一個地方嘅教育制度(甚至是非錯對)，被一個專攻意識形態、專玩政治鬥爭嘅集團所把持，都係注定勢危，所以家長嘅把關真係好重要。家長們，喺你地仲係小朋友嘅年代，課本係唔會叫你歌頌英國保守黨，亦唔會叫你講下聽完《God Save the Queen》之後有幾感動，當年嘅小朋友都尚且可以逃過政治，但今時唔同往日，今日教育官員話乜嘢啱、乜嘢錯，絕對信唔過，唔信你合埋眼諗下邊個係吳克檢。所以家長們對政治都要有返小小獨立思考，去幫你子女學是學非，明辨是非。