同香港應該冇乜關係嘅2017年亞協盃外圍賽首場賽事踢完，本來今晚諗住搵link睇同樣係同香港應該冇乜關係嘅林李奧運男單羽毛球互片（嗰個台有但就係唔睇嗰個台吹咩），不過可以第一次睇到關島球會踢亞洲賽事以及都係同香港應該冇乜關係嘅關係索性全力睇呢場WFC級數有90%嘅波好過。
關島流浪FC（Rovers FC）今場作客先同某中亞一帶一路國家嘅球會多多伊交手，最後奮戰下輸兩粒。多多伊就睇得多，但流浪FC就真係唔知乜料，只可以睇球員名單，有好多關島隊代表，好似生返頭髮嘅關島鋼門Doug Herrick（靴域），踢過幾年美職嘅中堅Brandon McDonald（麥當奴），仲有剛被印尼球會Persela Lamongan（佩西拉）炒魷嘅翼鋒Shane Malcolm（馬干），即使流浪並非全職球隊，但呢幾位回流嘅球員都係以全職球員身分加盟，睇完我認為實力唔會差得過澳門賓菲加。
今日關島流浪班正選其中九人都係現役島腳，其中馬干加盟冇耐，呢位腳法幾好嘅翼鋒今年去到亞洲搵食，揀咗印尼呢個東南亞人口大國做落腳點，首先去到東爪哇省嘅泗水市向當地球會 Surabaya United（泗水聯）報到，經過一段時間測試，正式簽約成為首位登陸印尼職業賽場嘅關島球員，不過喺最初舉行嘅印錦賽A區賽事中佢表現只係一般，甚至後備上陣替佢嘅印尼本土球員作用比佢更大，表現不如本土球員對於一個亞援球員嚟講即係返得屋企，結果好快畀泗水聯炒咗，但好彩係泗水聯都算好幫佢搭路去另一支印錦賽A區球會Persela Lamongan（佩西拉），佩西拉亦因為等人用即簽，只可惜佢只係出過三次場，而且對球會嘅實際作用唔明顯，最後因為表現不如理想及佢唔適應印尼生活而提早走人。
而流浪得知馬干喺印尼冇乜運仔就通知佢問佢有冇興趣以全職球員身分返嚟玩一陣，失緊業嘅佢當然仆返嚟啦，就係咁呢隊同關島代表隊冇乜大分別嘅流浪FC就形成喇。其實呢雖然話印尼足球水平低，但真係唔係阿豬阿狗有腳都踢得，有時當地生活環境唔適合自己就係唔適合。