今年立法會選舉，錯綜複雜，建制繼續種票，泛民繼續含淚，熱普城又鬼，梁天琦同中出羊子無得參選，青年新政柒事一堆，作為一個廢青選民，可以點？
問一問自己，邊個係你隊友？本身就當然係All In梁天琦啦，但係而家呢個局面，借青年新政去還魂，似乎已經係唯一可行。雖然青年新政唔係純本土派或者獨派，近期黃俊傑、游惠幀又中晒伏，已經出現不少批評佢地嘅聲音，不在此重覆。但論政見及作風，青年新政已經叫做最接近，呢啲係咪叫「馬死落地行」？我覺得唔係，只係「騎牛等馬」姐，等隻本土馬休養生息，捲土重來。
青年新政係隊友，你可以挑剔隊友，但絕不能放棄! 認真，黃俊傑、梁頌恆、游惠幀等人全部都未過30歲，但已經要承受香港未來嘅巨大壓力，仲要加埋本土派選民嘅期望，唔係當事人，相信好難體會到果種感受。正如五月天阿信係《將軍令》咁寫:「在昨天你我還是頑童，而今天雙肩如此沉重」，初哥犯錯，人之常情，唔洗一下就判死刑嘅，點解唔可以比機會佢地改善? 無錯過又點知咩先係正確？
咁當然，「錯就要認，打要企定」，相信青年新政都深明此道。舉個例子，係公司，有同事做錯野，屌佢唔係問題，但屌完之後點樣先令佢識得做？要教育，要引導，要歸納，等佢地明白自己做錯啲乜，係錯誤中學習，咁先會進步，過程之中可能好辛苦，但咁樣係成就團隊嘅必經之路。所以，大家屌佢地做得唔好係應該的，但屌完之後唔該唔好放棄佢地，比反應令佢地去反思自己有咩要修正，真係唔掂先引導佢地去諗下一步，有能力做佢地背後嘅諸葛亮，大有人在。
要時代革命，要破舊立新，就要玩團隊，否則定必潰散！