文和圖：「做個聰明選民」運動
佢哋用「掌心雷牌」GPS 配票不特只，重要唔俾我哋睇民調，攞走埋我哋唯一嘅指南針！
千祈唔好益咗保皇黨同建制B隊，如果你仲未決定投俾邊個，快D去「聰明選民工具箱」攞D工具嚟收窄名單啦！
個箱裏面有收窄名單兩大工具：「質素」同「勝算」
估量「勝算」
估量參選人勝算除咗睇民調排名位置外，重要睇埋参選人嘅「被支持度走勢」，再睇埋游離票嘅影響，加加埋埋就可以增加對「勝算」估計嘅準確度（係增加、唔係肯定，係無可能肯定嘅）。
「前線科技人員」根據港大滾動民調嘅原始數據製作咗一個非常清楚好用嘅互動圖，只要你去嗰個專頁，揀你個選區，再揀個參選人嘅名，佢條「民調走勢線」就會出現，你再揀多幾個人名，就可以作出比較；「前線科技人員」好周到，又喺走勢圖嘅旁邊出一個當區所有參選人嘅「民調排名」表俾你參考。
更精采嘅喺無論係走勢圖或係民調排名表，你都可以揀包唔包括「游離票」（即喺未决定嘅票），包括「游離票」咪又可以準確一D囉。依個專頁係會不斷更新嘅。
好嘞，睇埋走勢同民調排名，如果發覺有幾個人勝算差唔多，咁又有咩橋呢？咁就要用番「質素」呢個工具。
好使好用嘅「質素」
我哋先用「質素」做第一輪嘅收窄名單，揀自己喜歡或可以接受嘅參選人，然後再用「勝算」做第二輪嘅收窄名單，如果可以接受嘅參選人「勝算」都差唔多，咁我哋咪可以用番「質素」呢個指標嚟導航囉，係「勝算」相若嗰幾個參選人裏面揀自己最鍾意嗰個。
「聰明選民工具箱」裏面集中咗最有用嘅材料方便大家去比較參選人嘅質素，包括有：
1. 各區參選人議題問卷答案並列表
2. 五區及超區「聰明選民與參選人對談會」
3. 主要選舉論壇
4. D100參選人專訪
只要我哋靈活運用「勝算」同「質素」依兩個工具，就唔會益咗保皇黨同建制B隊。