今日就係香港立選投票日，唔講波住講講新東區先，我係新東選民當然比較留意新東形勢，今次有二十二個參選名單爭九個位，好似好激烈，實情有力吸票只係得十二、十三個名單，其他俗稱陪跑，雖然當選機會唔高，但呢班呢班陪跑都不缺支持者，好似李偲嫣咁，無論你幾撚討厭佢都好都唔可以否認有班志同道合真心撐佢，甚至會投票畀佢。而侯志強更加唔駛講，分明開民建聯拖已引到少量唔投泛民本土又唔妥民建聯嘅選民去投佢，仲有一班圍頭佬為利益都會撐佢，即使最後對選情影響唔大，但都唔代表佢哋冇存在意義。
邊個係新東票王，邊個會入到閘，好多政治專家都有分析，我就廢事扮專家講埋一份，不如分析下邊個最少票仲好啦！廖添誠同麥嘉晉雖然民調長期排下游，但我相信佢哋嘅立場都會吸引到一啲游離票，肯定唔會係最少，而傘兵黃琛喻喺論壇令人留下深刻印象，相信會吸到些少唔想投陳云根、梁頌恆及傳統泛民嘅人去投佢，所以我相信新東低票之王會係梁金成同陳玉娥兩個之爭。
有人會認為陳玉娥同李偲嫣係同一種票源，事實上兩者有好大分別，陳玉娥講嘢比李偲嫣更冇理據，只係好似烏蠅咁不停喺泛民及本土派候選人耳邊重複無謂詞語，除此外亳無作用，佢參選我相信有兩個原因，第一係以騎尼方式爭取知名度方便日後R撈，二係故意拖低論壇質數令選民對選舉失信心。所以我有個陰毛論，佢嘅參選就係為咗抬高李偲嫣嘅質數，雖然喺論壇上李偲嫣都係好似潑婦咁隊人，但對比陳玉娥又真係高質好多喎！所以我相信陳玉娥會係由尾數上嘅票后，但我唔排除佢真係有真心支持者，大家要知道從政綱領只係鬥鳩噏，論壇上辯論技巧唔代表佢有議政能力，可能有人欣賞佢如此盲目支持CY就投畀佢，或者冇個睇得上眼，是旦投個最騎尼嘅，喂，香港地咩人都有，好奇咩？
而梁金成本身係繼陳云根及梁頌恆外另一本土派候選人(范國威就唔計啦)，本身佢係拍陳國強出選嘅，不過陳國強被DQ，而本土派支持者主要係選擇陳云根及梁頌恆，由於跑出機會極細結果梁金成被嚴重無視。雖然梁金成被歸為本土派及獨派，但由於佢臨時取消今年五一上水反水貨行動，加上某些言論令部分本土派及獨派支持者不滿，所以被部分人稱為''不可相信的鬼頭仔''。雖然勝算極低，但唔排除有人因為佢積極關注水貨問題而投票畀佢，另外有少量本土派及獨派支持者末必相信陳云根及梁頌恆，梁金成亦有可能成為佢哋第三選擇，仲有一個投佢嘅可能性就係支持被DQ嘅陳國強甚至名單二號嘅高登仔邱文勁，總括嚟講我相信低票之王方面梁金成始終敵不過陳玉娥。