近排印尼Goal.com有篇文係話印尼應唔應該選班入籍歸化兵入去國家隊踢年底東錦賽，話說早排印尼約戰馬拉，教頭Alfred Riedl只係揀咗一位血統兵入隊，其他都係土生土砲，而且有部分係第一次入國家隊，不過佢哋表現都幾對辦，結果以三蛋大炒馬拉，由於呢場波班土砲表現幾好，球迷就喺到估Riedl會唔會放棄班入籍歸化兵？
有球迷就覺得當日約戰嘅馬拉真係近年最弱，炒三蛋根本反映唔到啲乜，到最後一定要揀返啲入籍歸化入去，始終佢哋能力高少少都係對印尼足球有幫助。而另一批印尼球迷就認為現時好多冒起嘅25歲以下印尼球員都有返咁上下值得入選國家隊，而班入籍歸化又唔係勁好多，佢哋嘅任務已完成，應該畀返多啲機會班本土球員，大家你一言我一語，嘈到家下都未有結果。
睇完呢篇文，我諗起香港，香港同印尼一樣，近年男足都係有用入籍歸化兵幫手，戰積係有改善，但唔同嘅係香港愈用愈多，而印尼就由以入籍歸化兵做主變成入籍歸化兵為副，近排甚至用返本土球員。
用本土球員當然係好啦，但香港同印尼喺本土可用球員方面就好唔同，雖然印尼足壇呢幾年亂過陰毛，聯賽又試過被叫停，但最少多年來青訓冇乜點斷過，每年都有全職業嘅U21聯賽舉行，所以經歷幾多事都好，佢哋都會有適合球員接上，所以用返本土球員係遲早嘅事，但香港就完全相反，千禧中期幾乎完全放棄青訓，係近年先重視返，結果現時就承受惡果，接到班嘅本土新力軍唔多，而入籍歸化又喺呢個時間夠期，所以咪以入籍歸化為主。但又有個問題，係咪真係需要咁多呢？
講到呢度我又諗起越南，佢哋都有歸化兵，但國家隊冇選佢哋，越南高層就話唔需要，因為越族球員已經夠質數。有冇質數就冇識波牌講唔到，但最少班越族球員真係可以用佢哋嘅技術贏到敘利亞先，如果香港現時班華人本土球員對住馬代、馬拉係可以穩贏嘅，我諗都唔使咁多入籍歸化兵喇，但......