前日孟加拉畀不丹淘汰緣盡亞洲盃，只能參加弱版主席盃「團結盃」，賽果震驚關心孟加拉足球嘅孟加拉球迷，因為上年年尾孟加拉先喺南亞足球錦標賽入面以三比零輕鬆大勝不丹，點知未夠一年就畀一支孟加拉國家隊從來冇放過入眼內嘅南亞對手 - 不丹淘汰出局。孟加拉足球喺亞洲入面雖然長期積弱，但對住不丹呢類對手佢哋從來都係佔優，點解現時會搞成咁呢？
先講返執教過多支非洲國家隊嘅教頭比利時人Tom Saintfiet喺賽後講咩先，佢話對孟加拉被不丹淘汰感到震驚，而且佢唔知係咪仲要講說話幫自己親手帶個班球員，因為班球員喺兩回合賽事入面錯失唔少良機及犯下低級錯誤，而且唔聽指令各自為政，而最不可原諒係孟加拉有職業足球聯賽，國家隊全數都係職業球員，足球硬件上幾乎所有嘢都先進過不丹，但國家隊卻喺國際賽一年畀一年低沉，先係南亞足球錦標賽入面畀尼泊爾、馬爾代夫呢類得半職業聯賽嘅國家隊，然後喺今年八月舉行嘅亞協盃外圍賽代表孟加拉參賽嘅Sheikh Russel(謝赫羅素)又畀 不丹嘅Tertons（德童斯）淘汰。最後佢補充，孟加拉足球係時候要諗諗自己條路應該點行落去。
此話一出，有球迷認同孟加拉足球應該要接受現實認真檢視下自己，但亦有球迷屌到阿Tom仆街，因為班球員係阿Tom自己揀，有一半都係最近先入選國家隊做大國腳，而且都係經驗唔多嘅後生仔，而過往有一班國家隊主力都畀佢放棄咗，例如一班踢緊Sheikh Russel（謝赫羅素）嘅球員，包括兩名前鋒Jahid Hasan Ameli及Mithun Chowdhury，中場Zahid Hossain及Atiqur Rahman Meshu等人都冇冇入選，而喺南亞足球錦標賽入面表現幾搶鏡嘅前鋒Shakhawat Hossain Rony及中場靈魂Mamunul Islam都唔喺名單內，可以話係大執位，因為阿Tom睇見呢班常規主力喺上年世界盃外圍賽嘅表現好一般，所以決心選返一啲喺孟超聯比較積極嘅後生仔，但因此惹來部分球迷質疑呢班新國腳及邊緣國腳有冇資格做大國腳。
結果孟加拉畀不丹淘汰，阿Tom當然係畀人屌得最犀利嗰位，但我就覺得佢有句講得啱，就係你孟加拉有晒發展足球嘅條件，喺2007年仲推行職業足球聯賽，但點解會淪落到畀仲係以業餘為主嘅不丹淘汰呢？
成立職業足球聯賽對一個國家嘅足球發展好重要，但唔代表係靈藥，因為職業足球聯賽可以只係一個名而已，大把國家地方都係換個名就自我感覺良好，入面嘅嘢都係照舊，孟加拉其實就係代表之一。而某些球隊得到大水喉撐腰，球員得到優厚待遇，可能係咁搞到某些球員踢國家隊時疑似不盡力怕受傷搵唔到食，表面職業，但實際得啖笑，而心態亦唔健康，咁究竟孟加拉足球條路應該點走落去呢？