印尼東部巴布亞省住咗好多原始族群，包括Asmat，即係阿斯馬特族，一個以木刻傳統聞名於世嘅族群，主要生活於印尼巴布亞省西南部，人口約七萬，過往有食敵人嘅肉及獵人頭習俗，但現時呢種習俗因為印尼政府禁止而消失，不過呢個族群除咗木刻同食人肉外，仲有一單事件令外界對呢個族群念念不忘，就係前美國副總統Nelson Rockefeller之子Michael Rockefeller於1961年11月17日拜訪阿斯馬特族後離奇失蹤事件，Michael Rockefeller本身對呢個隱世民族嘅文化好感興趣，官方說法就指佢翻船後浸死，但有人就話佢係畀某些族人斬殺及食咗，更有人話佢只係隱姓埋名喺當地生活，究竟佢去咗邊冇人知，但就令阿斯馬特族增添神祕色彩。
直到今日部分阿斯馬特族依然過住原始生活，以森林為家，但亦有部分已經城市化，搬到印尼最東端嘅城市Merauke(馬老奇)生活，其中今日印尼職業足壇內都有一位阿斯馬特族人球員，佢就係高大中堅Yesaya Desnam(迪斯南)，今年31歲嘅佢係印尼職業足壇入面唯一一個阿斯馬特族人，出生於馬老奇，出道於當地業餘球隊PS馬老奇，效力嘅第一支職業球隊係Persiwa Wamena(佩西瓦)，由第一季起就係球隊正選，曾經協助佩西瓦奪得印尼超亞軍，亦跟過佩西瓦出去泰國、香港等地踢亞協盃，2010年因為爛打搏命之表現而初次入選印尼國家隊一同出征鈴木盃，成為首位入選印尼國家隊嘅阿斯馬特族人，但喺盃賽入面從未上過陣，只係友賽馬爾代夫一戰出過場，之後就冇入過國家隊，球會方面亦試過畀佩西瓦拖一年糧，最後佩西瓦降班後忍痛離隊轉投Persebaya Surabaya(泗水)，但踢咗幾場就因為聯賽叫停冇波踢，呢段冇波踢嘅時間佢喺瓦梅納市打政府工過活，今年初正考慮退役時，參加印錦賽A嘅球隊Perseru Serui(佩西路)突然搵佢出山，於是又做返職業球員。
雖然迪斯南唔係話特別標青個位，但都係一個非常勤力嘅球員，而好似佢呢類成為印尼公眾人物嘅阿斯馬特族係極少，至今好多外國報導形容阿斯馬特族人都係野蠻同兇殘嘅族群，但現實中生活於大城市嘅印尼貪官比佢哋更野蠻同兇殘，亦忽視咗有部分阿斯馬特族人好努力咁融入社會緊，點解佢哋成日畀印尼爪哇人歧視又唔見幾多人講呢？