立即捐款

Momay

我係熱愛足球嘅油漆佬。 網誌

體育

吉布提——被公認的非洲足球魚腩

吉布提——被公認的非洲足球魚腩
廣告

廣告

睇睇現時國際足協男足世界排名,包底嘅有兩個非洲國家,一個叫厄立特里亞,另一個叫吉布提,雖然同是世界包尾,但戰積上吉布提比厄立特里亞輸得更慘烈,究竟呢個位處非洲東北部亞丁灣西岸小國嘅男足戰積衰成點呢?

不過先要了解呢個小國喺世界佔咗個乜嘢位置,雖然呢個小國非常貧窮,但地理問題因素有其戰略地位,因此近年呢個小國亦於世上漸漸地出名起嚟,肯定比鄰國厄立特里亞更響啦,因為已吸引美軍及法軍喺當地設立軍事基地,而日本都會喺明年追加租借土地擴建軍事基地,中國當然都有份差隻腳埋去,今年2月開始起海外軍事設施,因此吉布提都受唔少以上國家嘅經濟援助,但只係基本民生設施及部分行業受惠,體育運動依舊停滯不前,或者貧窮問題嚴重,政府較著力於民生改善上,所以包括足球等運動都要靠邊站。

不過同好多非洲國家一樣,足球係當地人民最熱愛嘅運動,國內有一個頂級業餘足球聯賽叫Djibouti Premier League,雖然係業餘性質但平時都有唔少捧場客,當中幾個月前舉行嘅Djibouti Cup決賽由Djibouti Telecom對Dikhil FC就吸引過萬人入場睇波。但好可惜吉布提男足喺非洲係公認嘅大魚腩,經常因為實力不足畀人大炒,例如上年舉行嘅非洲盃外圍賽就6戰全敗失24球,其中被突尼西亞炒8比1,連喺非洲內實力唔上唔落嘅利比里亞都輕鬆炒吉布提5粒,而2018年世界盃外圍賽非洲區第一圈,吉布提喺2回合輸畀斯威士蘭8比1出局,之後都畀其他非洲國家大炒過好幾次,對上贏波已經係2007年嘅事,當時踢2010年世界盃外圍賽,主場以1比0險勝索馬里。

而同大部分非洲國家唔同,吉布提只有極少數球員可以出外踢職業足球,比較成功係現年29歲嘅中場球員Ismail Hassan(哈辛),曾經喺斯洛伐克、羅馬尼亞及法國搵食,但佢本身於法國出生,青年時代接受過里爾專業訓練,所以畀吉布提國內出生嘅球員都幸運。

雖然吉布提都唔係話唔積極參與賽事嘅非洲足協會員,但可能實力太弱,所以難以引起球探注意呢個國家嘅球員,絕大部分吉布提球員只能於國內踢業餘聯賽,當地政府亦冇心發展足球事業,所以我相信吉布提要擺脫非洲足球魚腩之名,現階段都幾難。

廣告