立即捐款

Momay

我係熱愛足球嘅油漆佬。 網誌

體育

日本足球員希望歸化印尼代表印尼出賽?

日本足球員希望歸化印尼代表印尼出賽?
廣告

廣告

雖然今次印尼鈴木盃名單只有一個血統球員,全部都係本土土砲,印尼似乎有棄用血統歸化球員嘅可能,但依然有喺印尼踢咗多年波嘅外籍球員表示希望歸化印尼,包括效力Persiba Balikpapa(佩斯巴)嘅日本中前松永祥兵,呢位球員喺印尼踢咗五年波,已有資格申請歸化印尼。

當好多人以為日本球員因為民族性好難會放棄自己國籍時,松永祥兵卻表示自己鐘意印尼呢個國家,已經習慣當地生活文化,雖然印尼話講得唔流利,但已經唔需要翻譯,松永祥兵就喺8月份表明希望成為印尼公民代表印尼出賽。

“Saya masih berharap ada kesempatan untuk dinaturalisasi, menjadi bagian dari Indonesia. Saya sudah lama bermain di Indonesia, sudah sangat paham.”

「我還是希望可以歸化,成為印尼一分子的機會。我一直在印尼踢球,已經非常了解(印尼)了。」

不過當然唔係話歸化就畀你歸化,都要睇睇今次印尼主用土砲踢鈴木盃係咩戰積,如果戰積幾好,應該都唔會點玩歸化政策。但如果踢到一Pat屎,可能就會揀返啲歸化兵入國家隊增加實力,松永祥兵現時27歲,都唔係冇機會成為史上第一位日本人放棄日籍歸化做印尼人嘅日本足球員。

呢位日本足球喺史浩克04二隊及愛媛FC留過腳毛,2011年起去到印尼發展,首站加盟萬隆,表現非常出色,後來轉投過錦石聯及佩斯巴等中小型球隊,射入過唔小波,今年為佩斯巴射入13球成為隊中射手,當松永祥兵透露希望歸化印尼時好多球迷都好吃驚,首先諗唔到民族性強嘅日本人會願棄日籍(印尼只容單籍),然後松永祥兵嘅能力的確係幾好,如成事對國家隊一定有幫助,佢係現唯一一個堅持留喺印尼發展嘅日本足球員,以佢質數亞洲好多二三線聯賽都啱佢,但點解佢會長期逗留喺印尼呢?可能就如佢所講,佢鐘意呢個國家。

廣告