立即捐款

毛言地

你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 網誌

生活

企入一步洗死咩大佬。

企入一步洗死咩大佬。
廣告

廣告

香港人有幾仆街,你搭一轉港鐵就會知。

我講緊嘅唔係讓唔讓座或者關愛座坐唔坐得,一嚟個問題你嘈多一百年都唔會有改變,二嚟喺你想坐低之前首先你要上到車——連車都上唔到你仲講乜嘢坐得安唔安落讓唔讓位?如果㗎車真係迫滿哂,針都插唔落當然冇計啦,但最討厭嘅係好多時你會見到㗎車只係門口附近企滿人,但喺中間扶手或者坐位前少少嘅位置係好・撚・空,空到你喺度打坐都冇問題。

香港人成日覺得自己時間好寶貴,等多一秒都好似搶咗你幾百萬咁,特別係迫上車嗰一刻直頭係搏老命咁攝入去。但佢地又淨係覺得自己啲時間好寶貴,當上到車後自己背脊或者個袋離車門有兩三毫米左右距離佢地就會停喺度,完全唔理外面仲有幾多人想上車,而車入面嘅空位又絕對夠企多十個八個。明明上一秒你仲係嗰個急住上車趕時間到死嘅人,但一上到車你就無視外面同樣好心急上車嘅人,企正喺門口做你平時最憎嗰個路霸角色。

個個一味鬥企得近門口,要落車做第一個衝出去,要做成車人最快啪到卡出閘嘅人。但係為咗比你快兩三秒出閘而要十幾個人Miss班車你點解會覺得一啲問題都冇?唔好當你秒秒幾廿萬上落啦好冇,你真係咁把炮就一早自己揸部GTR代步,唔考車牌都可以搭的士搭Uber啦,洗同人一齊迫地鐵做沙甸魚咩。你行入兩步對你影響唔大,但人地趕唔到班車除時真係遲到收場啊大佬。

每朝趕返工放工嘅唔止你一個,全月台大部份人都係為兩餐趕住去做嘢。如果比你有幸上到車,拍硬檔行入去中間個位,比多幾個人上車啦好嘛?企入一步洗死咩大佬。

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:香港網絡大典

廣告