從前我們縱狠批政府，但總未至用中國的宮廷政治學來揣度。但當一切走樣，權鬥是那麼欲蓋彌彰，活脫是電視上的辮子戲，邊個阿哥可以身登大寶？時人都以宮廷之爭盱衡時局。我們仍然活在朝代的輪迴，世道衰微，見證香港的朱樓化作頹垣。
唯有人民能夠繼絕，保護我們一息尚存。
＊＊＊
問：兩位幾時發現污水廠的程序出了問題？
李生：我地用堆填區的沼氣，加熱處理污水，溫度有咁上下，污水嘅有害物質就會揮發。但沼氣唔可以無止境咁抽，抽過頭堆填區會著火。
鄒生：當沼氣質素差或者唔夠，就要喊油渣車幫手，燒油渣提高溫度，即係燒銀紙。9 月新嚟嘅經理徐子良，開頭都俾點油渣助燃，但後來開會就話唔想。去年 11 月 26 日，沼氣唔夠，溫度去唔到千度，佢指示我地將溫度降到 850 度。
＊＊＊
問：過去冇同樣情況？
李生：以前嘅經理成日提點我地，溫度唔好低過千度，一來係自己首先「瀨嘢」，揮發唔到二噁英，我地會首當其衝。
鄒生：二來每個當更嘅技術員都要負責，如果污水有問題仍然放出去，我地要上身。俾人捉到，孭左黑鑊，到時想講已經太遲。何況仲危害公眾。
＊＊＊
問：有幾多人知情？
李生：其實成個站好多人都知。要將紀錄交俾環保署，點會唔知？問題係肯唔肯講出嚟。
鄒生：我地同朱永寶三個人，諗住同佢（徐子良）開會，行番條正路。但開左幾次會，講就「照返以前咁做」，過兩日又反口覆舌。跟住佢仲鎖門唔俾我地驗水，到後來連控制室都唔俾我地埋去。咁就事態嚴重，佢點放污水都冇人知道。
朱生都係我地同事，佢嘅表達能力比較高，我地一齊開會，已經講到口水都乾，經理都唔肯接受。1 月 11 日上晝 8 點，朱生放訊息上員工群組，如果唔停止咁做，就話俾總公司同環保署。
李生：十幾分鐘之後，朱生就俾工程師鄭松鶴打。鄭已經係屯門法院判監九星期。
當日我地立即去醫院探朱生，佢要留院，我地返公司為朱生攞物件，經理同工程師搵人監視我地。我地攞完嘢，立即上附近環保署的辦公室，講哂件事出嚟。
鄒生：我係 12 號返夜更，立即收到解雇信。
李生：到我返工嘅時候，連閘都入唔到。佢地隔住個閘遞封解雇信，攞埋相機影我，話我已被解雇。
＊＊＊
問：而家朱生點？
李生：佢心口中左一鎚向後倒，後腦撞到消防喉，而家仲揸緊枴杖。
＊＊＊
問：被無理解雇後，生活係唔係顛簸？
李生：轉過幾份工囉。機場份工穩定，但來回時間太長，舊病復發，無辦法，咪出返嚟做地盤散工。
鄒生：見工冇回音，半年冇工開。問我點解唔做，只可以講同上司唔夾。而家都係做散工。
＊＊＊
問：你地會如何跟進，比如索償？
李生：係唔係無理解雇，要由民事訴訟去判，都幾花律師費，要諗清楚先決定。
鄒生：我地當然唔識寫英文信，係李卓人幫我地寫去總公司。徐子良已經被炒，證明我地冇做錯。我地只係想復職，冇其他要求。只要做正路，做咩工都唔駛驚。
＊＊＊
問：經過這次遭遇，有何感受？
李生：有明報讀者睇到報道，知道我地被炒後有啲拮据，聯絡我地請飲茶，當然心領。困苦係困苦，但有手有腳可以開工，仲未去到嗰地步。一句說話，多謝大家關心同支持。
鄒生：開頭以為市民漠不關心，逆來順受。但而家大家都關心，俾多啲壓力政府，要政府做好本份。唔係俾錢出嚟就算，仲要監察外判公司有冇盡社會責任。如果做到，我地就會安慰。