Indonesia Soccer Championship A及B都收季，而列為第三級嘅業餘聯賽Liga Nusantara（群島聯賽）其實早喺月中已收季，峇里島大城市丹帕沙球隊Perseden Denpasar總決賽以2比0小勝來自東努沙登加拉省嘅PSN Ngada Nusa Tenggara Timur（NTT），但由於當時印尼主流媒體主力報導鈴木盃總決賽事宜，加上只有網上直播，第三級聯賽嘅影響力細，重要性較低，所以決賽完結後都冇咩主流媒體報導，首次有東努沙登加拉省球隊打入群島聯賽總決賽係創造咗歷史，本身係一單爆料，但第三級嘅業餘聯賽，主流媒體點會無啦啦走去詳細講解，但非傳統媒體興起後要搵相關資料唔難，非傳統媒體冇受限制，除咗主流消息，亦會做所謂非主流消息，比賽完結後有唔少亞軍隊PSN Ngada Nusa Tenggara Timur（NTT）嘅網絡媒體報導相關故事，只要搵到渠道，必定搵到好多嘢睇，如果一味死跟睇餸食飯限制多多嘅主流媒體報導做人，你就只會永遠停留喺一個階段。
呢隊PSN Ngada Nusa Tenggara Timur (NTT)簡稱PSN Ngada或NNT，位於小巽他群島東部一個叫東努沙登加拉嘅省，根據地位於弗洛勒斯島嘅Ngada Regency（恩加達），呢度最出名係科莫多龍，因此吸引唔少旅客去到當地，當地風景優美，亦有唔少值得欣賞嘅部落文化，但當地體育就唔太發達，一直只有業餘足球聯賽，過往極少當地人成為職業足球員，基本上外界或印尼主流社會提到東努沙登加拉或弗洛勒斯島都唔會聯想到足球，但今年東努沙登加拉省嘅PSN Ngada（PSN 恩加達）就決定派隊參加第三級嘅業餘聯賽Liga Nusantara，近幾年東努沙登加拉省都冇派隊參加任何級別嘅印尼聯賽，被認定係印尼足球發展最落後嘅省份之一。
呢隊PSN恩加達所有球員都係當地人，大部分都係學生，被編於Group H，同中蘇拉威西省嘅Persipal Palu、北加里曼丹省嘅PS Pelangi Utara Malinau及日惹特區嘅Gama一組，賽前似乎冇乜人睇好呢隊波，但過完一關又一關，最後殺到入總決賽，雖然屈居亞軍，但表現受到恩加達居民讚賞，總決賽當晚比賽遠離恩加達舉行，但有3000名居民聚集市內一同收睇比賽直播，即使輸波，城市巡遊居民都喺市內巡遊，而PSN恩加達第二日返機場亦受到英雄式歡迎。
第三級嘅業餘聯賽Liga Nusantara（群島聯賽）雖然係比較少人理，但有佢嘅存在意義，好似恩加達呢類人口幾十萬又冇咩政治重要性嘅地方經常被印尼中央政府遺忘，好多居民自覺孤兒仔一樣，甚至有人認為呢度只有科莫多龍，如今PSN恩加達嘅成功，都叫為居民帶來短暫嘅自豪感及快樂。