印尼Kalimantan Barat（西加里萬丹省）雖然只有一隊職業足球隊，當地華人亦唔熱心參與足運，但部分以馬來人及加里萬丹原住民達雅人為主嘅偏遠縣份，比如西加里萬丹省首府坤甸（Pontianak）以西嘅內陸縣區Sintang Regency（新當縣）等，當地政府都搞咗唔少圍內進行嘅業餘足球賽事，絕非足球沙漠，今年11月底就有Bupati Cup（攝政盃），由新當縣14個區各區派一支代表隊參加嘅盃賽，14個區分別係Ambalau、Binjai Hulu、Dedai、Kayan Hilir、Kayan Hulu、Kelam Permai、Ketungau Hilir、Ketungau Hulu、Ketungau Tengah、Sei Tebelian、Sepauk、Serawai、Sintang同Tempunak，總人口接近40萬，西鄰桑高（Sanggau），北部同馬來西亞砂拉越接壤，東北同Kapuas Hulu Regency接壤，南同中加里萬丹省接壤，人口集中喺新當縣主城Sintang（新當），由於遠離華人聚居嘅主要沿海城市山口洋及坤甸，所以極少中文網站有提供新當縣等西加里萬丹省內陸地方嘅相關資料，呢度絕非熱門旅遊點，但每年都有少數自由行去當地欣賞原始美景，大部分居民都係馬來人及達雅人，但好似Sepauk呢類地區，曾經有唔少華人聚居，大部分喺19世紀後期由廣東東部南下去到當地發淘金夢，有部分華人成為當地土豪，但因為種族不和、政治及搵食問題，好多華人已搬去首府坤甸及爪哇島嘅雅加達等地生活。
Bupati Cup（攝政盃）舉行之主因就係以足球加強新當縣嘅團結意識，事實上新當縣過往發生過唔少種族血腥衝突，上世紀排過華，去到千禧年代外來民族馬都拉族與原住民達雅人矛盾導致大屠殺發生，足球係咪能夠團結當地居民？冇人知道，只知道冠軍獎金1500萬，為了獎金搞到部分比賽火藥味好重，團條撚結，最終Sintang（新當）隊決賽以3比2擊敗Ambalau，當日Baning Stadion座無虛席，比賽亦有網上重溫，港丙中下游水平，好似睇緊奇峰對北區咁，但攝政盃亦係挑選新當縣足球精英之時，下年新當縣會繼續組成Sintang FC參加印尼第三級嘅群島聯賽初賽，今次攝政盃係一次選拔賽吧。
圖：新當原住民達雅妹