只要有心，邊到都係足球場。
咩叫識踢波？我都定義唔到，但我好記得細個嗰陣嘅我（小學），真係連波都斬唔起，七人場呢啲地方就好似英超咁，有得睇冇得踢，所以嗰陣踢親波嘅地方都唔係正規足球場。走廊、後巷、公園，統統都係我嘅戰場，而流連得最多就係籃球場。
喺籃球場踢波，可能係唔少人喺成長階段都會做過嘅事，反正都係場，不用分那麼細啦，咪同5人場差唔多大細。籃球場唔俾踢波？俾人趕走咪扮打籃球囉，佢吹你唔漲，係幾厚面皮。
一個場，4打4，冇守龍，個個都要出嚟踢，籃球架中間兩條門柱當龍門，出坑渠／出白界當出界。你可能會問籃球架兩條柱距離得一個人身位，點入？咪就係要靠技術同精準，唔係靠遠射得手，咁易入俾你都覺得悶啦，有時嚴格啲仲要限你入三分圈先可以射，又或者只可以入地波，當然你都可以靠遠射得手，前題要有咁嘅眼界。
你以為企死喺龍門入面就可以唔使失波？少年，你太年輕了，人哋4個打你3個，你企死喺龍門只會變相打少個，加上總有啲PK 仔有理冇理都會「牛Ban」埋嚟，唔中你中條柱，嘭嘭聲都夠嚇死你。出嚟踢就唔同，全場周圍走，既可攻亦可守，練到氣又練到技術，啲盤扭技術都係靠踢籃球場練番嚟（雖然我唔叻扭波）！有時踢波踢到悶，轉打籃球亦得，得咗。
不過始終係籃球場，唔係次次都遇著冇人打籃球，有時要大家共用同一個場。試過一個場，左邊打籃球鬥波，中間踢波猜馬騮，右邊學生妹打排球，土地問題真係非常嚴重。好人嘅咪唔介意你喺度射波，各有各玩，河水不犯井水，但遇著啲冇情講嘅人，見你係細路仔就會趕你走，試過俾啲唔好老脾嘅大哥哥，二話不說踢走咗個波等你冇得踢、亦都試過唔小心射爆打緊籃球嘅人副眼鏡然後俾佢問候。
由細識到大嘅波友，其實大部份都係喺踢籃球場過程中認識，嗰時大家仲係小學雞又唔係好識踢波，咪柴娃娃一齊踢，咁啱籃球場旁邊又有個公園，有時都會踢踢下波成班人走咗去玩「幫捉」又或者去打籃球，成個場冇人仲可以玩用腳射三分，射唔入就射龜，所以諗番轉頭，可以由唔識到Friend到依家都幾奇妙。
其實踢籃球場呢個行為，去到出嚟做嘢都依然繼續，甚至認定呢個籃球場係我哋之間嘅「主場」，但可惜人愈大愈唔得閒，唔知係忙定係已經冇再踢波，大家都開始愈行愈遠，而呢個「主場」亦漸漸少咗啲打波聲音，直到熄燈依然寂靜，日復日，年復年，場邊嘅白線褪色唔再關我哋事，因為歲月已經取代咗我哋嘅位置。
然而其實點止呢個籃球場？以前跟隊跟到似打歐聯小組賽咁多隊嘅七人場已經水靜鵝飛，間唔中得番啲阿叔阿伯經過。
以前有場但唔夠料踢；
依家有場但唔夠人踢；
呢刻望住一片寂靜嘅球場，可有令你諗番起當日嘈喧巴閉嘅日子？