現時全球最多人認識嘅印尼職業球員並非印尼吸金王Bambang Pamungkas，更加唔係上年鈴木盃嗰班，而係一位叫Martunis嘅亞齊省居民，上年加盟葡超士砵亭青年隊。佢係2004年南亞海嘯倖存者，喺海上漂浮21天後倖存，被發現時身穿葡國國隊波衫，並聲稱偶像係C朗，而葡萄牙足球聯合會及C朗本人知道件事後拜訪過佢，亦向佢提供緩助，而佢最大夢想就係成為一名職業足球員，而且要好似C朗咁揚名立萬。
因為受到國際關注，喺4年前獲安排加入當地職業球會PSAP Sigli嘅青年隊受訓，去到上年就獲C朗穿針引線將佢帶去士砵亭青年隊，成為國際球壇新聞，C朗被激讚有愛心，而Martunis都成為全球知名度最高嘅印尼職業球員。但喺印尼球壇入面有唔少人就對Martunis唱反調，認為佢只係有C朗睇住，以佢嘅質量連印尼次級水平都無法立足，呢班人可能眼紅，亦可能講緊事實。現時Martunis返回印尼，但向外界指印尼有三間球會及馬來西亞有兩間球會正與佢經紀人接觸，不過同士砵亭青年隊仲有半年約，所以去向未明，但Martunis都承認自己有不足之處。
對於留喺歐洲定回到亞洲，Martunis嘅真正功夫又係如何，睇嚟都要一段時間先睇到，到時就可以證明佢係咪死靠C朗喇，2013年佢入選過印尼U19集訓隊，但好快被Out出局。