1. 好多人排隊買麥樂雞，又好多人鬧排隊的人貪小便宜。邊個啱？Well, 一盒9件麥樂雞，麥麥送要24.6，你自己去排隊買就10蚊。香港最低工資就32.5，即係呢條隊你排得多過27分鐘就蝕咗。
2. 咁當然你可以話，呢27分鐘你唔排隊都唔會用來返工。講得好，咁即係話你認同生命中有時其他活動係重要過錢的，例如打舖機。但係你犧牲咗本來可以打舖機的時間，而去選擇做一件到頭來都係為咗錢的事，咁從機會成本的角度來講，打舖機在你生命中的意義自然係更加唔重要。又如是者，自然要問一問，你係咪可以搵第二樣性質一樣（錢）但同等時間產出更多（賺多些少錢）的事情來做。
3. 又當然，你可以話排隊唔係為慳錢本身，而係慳錢帶來的樂趣。呢句說話，直白少少講，咪係貪小便宜囉。
4. 又又當然，你可以排一次隊買多過一盒麥樂雞，即刻抵翻（話時話老麥有冇限購？）。不過你真係要搵多個同你志同道合一齊食囉，好多卡路里㗎⋯⋯
5. 政府真係要學一學，以後有新政策出台，唔好計咩數，最緊要有 instant gratification 。醫保計劃唔好講咩套餐式收費點樣可以慳手術費，冇人明。不如直接話一 sign up 好似信用卡咁就送你多士爐光波爐，或者免費驗血一次之類，即刻又排晒隊。
6. 咁會唔會有人窮到真係要買麥樂雞嚟慳錢，而又冇能力搵一份有最低工資的工，連炒散都唔得？當然有，而幫佢地的方法係社會保障，係將起大白象的錢攞去扶貧，唔係靠老麥一年減幾日價。