上年印尼隊成為東南亞足球嘅神話，而踏入2017年先爆出老撾超聯嘅瀾滄聯，呢支老超新興勁旅喺包裝方面係向鄰近嘅泰國取經，所以喺球衣方面好有泰國Feel，就算老點唔熟老泰足球嘅波友話呢支瀾滄聯係泰乙球隊，我相信佢哋末google前都會深信。
講起老撾超聯職業化，日本出咗唔少錢同力，某些職業球隊比如老撾豐田都係日本公司出錢成立，外籍球員都係以日本球員為主，另外曾經都有越南老闆投資老超，除咗日越兩國，泰國都係老超重要外來勢力，唔少球隊Sponsor都係泰國公司，好似瀾滄聯就係其一。若講泰國與老撾足球交流，早喺泰國聯賽雙胞案完結後泰甲泰乙球隊就曾經多次引進老撾球員，即使老撾足球水平較低，但部分球員技術幾好，加上價廉，因此引起部分泰甲泰乙球隊注意，亦有球隊向老撾球員招手係為拓展生意，由於當時老撾未有職業聯賽，所以老撾球員普遍願意投向泰國。
而足球以外，10年前泰國及老撾就合拍過一部講老撾足球隊打入世界盃嘅商業電影''Lucky Loser''，但最後因為有老撾官員試睇後認為泰國人拎老撾人嚟笑而表示強烈不滿，因而引發老泰之間矛盾，最後片商要將片中老撾隊改成另一個虛構國家。
其實老泰兩國長久以來就有密不可分嘅關係，而文化亦十分接近，老撾語可以同泰國東北部一帶居民講嘅方言相通，雖然泰國官話同老撾語有好大分別，但老撾入面都有部分人識講泰國官話，因為泰國電視節目對老撾影響好大，因此有部分老撾人會去到比較發達嘅泰國發展，除足球員，仲包括演員及歌手樂隊，2006年就有一支老撾搖滾樂隊''Cells''南下曼谷同泰國最大唱片公司GMM Grammy Public Company簽約，Cells喺老撾樂壇彈起，樂隊早期曲風係Hard Rock，後來南下曼谷後就轉玩貼近流行嘅Pop Rock，出咗隻泰語/老語專輯，另外仲有隊老撾Hip Hop組合LOG都於同時期簽咗GMM，對於老撾歌手樂隊嚟講，泰國音樂市場比老撾發達得多，只可惜當時泰國唱片銷量都跌緊，再唔係王敏德去泰國出專輯唱首泰語歌就可以輕易大賣百萬張嘅無敵年代，Cells同LOG兩支過江龍最後都回歸祖國，不過專輯質素都獲得肯定，只不過泰國樂壇太多同類樂隊喇。
現時老撾超聯及老撾樂壇都比以往進步，但不論係足球定音樂，總係離不開一股泰味，我相信就算老撾有一日可以靠自己，都係擺脫唔到呢股「氣味」。