最近幾位國際知名球員登陸中國聯賽成為國際足球熱話，東南亞人口大國印尼都有引述相關新聞，而因為中超及中甲球員薪酬上漲，因此吸引部分印尼球員嘅目光，例如現時效力馬來西亞雪蘭莪嘅印尼邊鋒Andik Vermansah最近可能畀中超及中甲土豪迷惑住了，向記者拋出一句''Target saya berikutnya ke CSL, bukan Jepang,"（我的目標是進軍CSL，而不是日本。）
此話一出又引起網上球迷重提舊史，指Andik Vermansah曾經極有機會踏足日職，最終卻因為金錢而加盟雪蘭莪，指Andik眼中只有錢，而冇諗過自身嘅能力本身未必能夠喺中超立足。我早前都講過Andik棄日投馬嘅故事，當中同佢家境有關，因為中超球員薪酬上漲使佢以進軍中超為目標都唔出奇，但佢實在太細粒，喺中超入面非常輸蝕，而且又唔係真係話勁到飛天嗰隻，好難想像忽然會有中超球會睇中佢，就算中甲球會都唔會無啦啦搵佢啦，又冇亞援位。我唔係話一竹篙打一船人，但好多中國球壇中人一向睇唔起東南亞足球，包括印尼足球，見到你喺馬來西亞踢波，就覺得你水平有限。
而歷史上未有印尼球員去過中國搵食，但執教Barito Putera嘅巴西教頭Jacksen球員時代去過中國搵食，現時效力Arema嘅Raphael Maitimo未入籍前效力過北京理工大學。而中國球員去印尼搵食嘅個案反而唔少，比較成功嘅有曾誠、張爍，發展唔太如意有牟永杰、李昊原、黎志星，當吳攀於2013年去到Pelita Bandung Raya試腳因為唔習慣環境而閃人後就再冇中國球員去印尼搵班落，因為中超中甲甚至中乙都漲價，當時曾誠被借去Persebaya係2000蚊美金一個月，現時一位門將喺中國出道應該唔止呢個價，漲價令唔少球員放棄外流拼搏，而中超中甲都佔唔到一席嘅都唔洗去印尼、泰國、新加坡搵機會，因為部分中乙球會出手幾重，甚至部分非超甲乙球隊獎金都幾和味。
Andik Vermansah有呢個目標唔奇哇，但下一站泰超可能會緊貼現實啲。