今日印尼足協開大會，決定取消對泗水球隊Persebaya Surabaya嘅制裁，今年可以參加次級聯賽（甲組），得知消息後，數以千繼Persebaya Surabaya球迷上街慶祝，而會方亦宣佈目標係2018年重返印尼超。
Persebaya Surabaya（佩西巴亞泗水隊）成立於1927年，係印尼東爪哇省最多支持者嘅足球隊之一，喺2009-2010印超聯賽季不幸降班，但2010-2011賽季一個全新嘅職業足球聯賽Liga Primer Indonesia（LPI）成立咗，泗水隊決定派一支強隊參加新聯賽，就以本身個殼再以Persebaya 1927名義參賽（印尼華媒常稱泗水1927，下稱1927），由於保持中立，於是乎老闆向一支東加里萬球隊賣下一個殼再以Persebaya Surabayaa名義繼續參加舊足協嘅次級聯賽，因此Persebaya Surabayaa分咗A、B兩隊，實力較好嘅球員都喺1927內，被稱為Persebaya Surabaya A。
2011年底Indonesian Premier League成立，1927都有參加結果屈居亞軍，此時大部分Bonek都主力去睇1927，因為佢哋認為呢支1927成立嘅1927先係真正泗水球隊，1927每次主場賽事幾乎座無虛席，而踢次級聯賽嘅Persebaya Surabaya（佩西巴亞泗水隊）主場平均只有7,000人入場。
2014年印尼聯賽雙胞案結束，Indonesian Premier League（IPL）被消失，PSSI（印尼足協）重新執政，並不承認1927合法地位，只承認雙胞時期於舊聯賽嘅Persebaya Surabaya，結果1927被消失，惹來Bonek怒吼，雖然嗰支於雙胞時期以買殼形式踢舊聯賽嘅Persebaya Surabaya(Bonek常稱Persebaya Surabaya 2010)繼續存在，但Bonek就認為呢支2010年成立嘅Persebaya Surabaya不能代表泗水足球，因此拒絕入場及上街示威要求印尼足協回復1927真身。
Persebaya Surabaya 2010已數次更改名稱換形象，甚至改過名做Bonek FC，以Persebaya Surabaya忠誠球迷專稱起名，但都改變唔到Bonek嘅想法，因為絕對唔會因為改一個名就可以解決所有問題，上年同警察隊合併改名叫Bhayangkara Surabaya United（巴楊卡拉泗水聯），財力不成問題，門票經濟，但Bonek繼續罷睇，更有球迷團體將Bhayangkara Surabaya United告上法庭，要求Bhayangkara Surabaya United取消以''Surabaya''（泗水）為名，結果法院判球迷團體勝訴，Bhayangkara Surabaya United改名做Bhayangkara United。
除Persebaya Surabaya外，仲有其他6隊球隊被印尼足協制裁，包括Persibo Bojonegoro，即係2013年被晨曦喪炒嘅佩斯寶，佩斯寶被制裁原因正正係2013年於亞協盃不認真作賽有關，現時恢復會員身分，今年可以參加印尼足協搞嘅比賽，雖然回復自由，但佩斯寶經理人Abdullah Umar對於佩斯寶被安排喺群島聯賽起步（乙組，第三級）感到失望，Abdullah Umar指，佩斯寶值得踢甲組聯賽，並質疑點解Persebaya Surabaya可以由甲組聯賽起步，自己就要喺乙組？有球迷就分析，可能同佩斯寶影響力不足有關。
今年乙組係咪接受職業球隊參賽都仲係未知數，若果維持業餘質素，佩斯寶一樣要請業餘球員，大大減低升班可能性。