踏入2017年，好多亞洲國家地方嘅足球聯賽都開波或即將開波，但斯里蘭卡嘅Sri Lanka Football Premier League（斯里蘭卡足球超級聯賽）依然踢緊2016年仲未完成嘅賽事，呢個有球隊係職業，有球隊係半職業餘嘅足球聯賽一直以嚟都唔係跨年聯賽，但上年去到Championship Round（Super 8）階段就突然畀斯里蘭卡足協叫停，原因係聲稱要為斯里蘭卡國家隊備戰嘅團結盃作提早準備，避免球員因為Super 8嘅賽事受傷影響國家隊，但斯里蘭卡足協事前冇通知任何打緊Super 8嘅斯里蘭卡球隊，搞到球隊大失預算，因為部分球隊有職業球員及職業外援，一切都要錢。
諷刺嘅係斯里蘭卡國家隊去完柬埔寨集訓增加5位傷兵，而團結盃又小組出局，本嚟團結盃之旅結束斯超聯就會繼續，但又遇著科倫坡地區周圍傾盆大雨，最終令比賽推到去2017年1月繼續進行，因此出戰2017亞協盃Preliminary round嘅由2015斯超聯冠軍Colombo FC（科倫坡FC）頂替，斯超聯就變成跨年聯賽。
其實由前年喺世盃外畀不丹淘汰後，斯里蘭卡足協就宣佈一系列改革措施拯救斯里蘭卡足球，但就被批評連掌權斯里蘭卡足球嘅人本身對足球都唔係太認識，而近年斯超聯即使有同網站合作推廣本土聯賽，喺網上都可以免費睇到直播，但末能吸引更多球迷入場睇波，甚至網上直播好多時都係得幾百人在線，試過最慘得1人在線。
但唔代表斯里蘭卡人對足球冇興趣，即使板球係大佬運動，但英超西甲喺斯里蘭卡都多客仔，而斯里蘭卡足協搞嘅FA CUP（足總盃）上年開波時就有672隊報名參加，參與足運嘅人多，但達全職水平嘅球隊寥寥可數，冇一個健康嘅環境令斯里蘭卡足球人才流失，斯超聯水平太低又難以吸引球迷收睇，近年斯里蘭卡足球喺國際嘅成積差到爆，都同以上因素有關，隨住不丹冒起，斯里蘭卡足球正式成為南亞地底王了。