圖片來源：不是垃圾站
今天（16/1/2017）立法會垃圾收集及資源回收委員會上發言稿：
主席本人十多年前係一名喺職業先修中學學生，七年中學生涯我被訓練到有一身唔錯嘅手藝。我嘅第二份嘅工作，就响一間電腦公司，做printer嘅維修，當年我地係點樣整機嘅呢？d壞機收返唻，壞左一PART，但拆開部機，仲有好多好嘅零件可以用。收十部壞機返來移花接木，起碼可以救返五六部壞機，好彩嘅話甚至可以救返七八部。透過d種移花接木嘅方法本來係要棄置十部機嘅，但最後只係需要棄置兩部。
但可惜嘅係，好似我地呢d能夠處理維修工作、減少浪費嘅師傅，今日嘅生存空間越來越見收縮，除非係依附响一啲商業機構底下，否則我哋根本冇辦法獨立咁做一門維修小生意。
過去我哋仲可以喺街邊見到一啲，獨立運作嘅修檔口仔，唔使用電果D，好似嗰啲磨刀師父，補鞋師父，鐘錶師父，打鐵師父……今日都難以再响街頭見到，原因係呢一啲師父，已經畀食環署小販管理隊趕絕。
要用電果D師父又點呢？好似修理小型家電，又或者補衫師傅，佢哋通常呢都係响啲樓梯底或者行仔拉電做生意。佢哋所面對嘅，就係地政署同屋宇署嘅趕絕。
既然今日係討論到資源回收，我就得為一班維修師傅尋求一條生路，我非常贊同環保組織「不是垃圾站」代表所建議嘅，將社區內嘅單層垃圾站改建為多層嘅資源回收中心，預留一層讓一班能夠協助維修減廢嘅師父，可以進行移花接木嘅減癈維修。而為左方便師父尋找parts，各個回收中心之間應有互相通報嘅機制，做到棄置物嘅配對，方便維修師父尋找相同款式去移花接木。維修完畢，就可以送到二手物品樓層，循環再用。
而在各種棄置物當中，最值得作試行嘅，一定係傢俬，我地每次經過垃圾收集站，都會見到被棄置嘅傢俬，而有好多只要做簡單維修就可以重用。好似梳化椅咁，好多情況係一隻梳化腳壞左就成張掉，但其實只要拆到另一張壞梳化嘅四隻腳畀佢，裝拆12口螺絲，就能夠重用。簡單維修其實好多人都識，甚至唔需要搬搬抬抬，運落離回收中心。就以上例子丫，你將損壞情況影低，師父睇完，就拆四隻梳化腳俾你，借埋支電動螺絲批俾你，用完還返。咁就可以減少一件大型傢俬嘅浪費。其實只要响社區設一個「工具借用站」，傢俬浪費嘅情況就可以大幅減少，普通人好多時D野不是唔想整，而係冇「嫁餐」啫！唔通為左整下張櫈，就要去買電鑽、電批、即梳、鎚仔咩。
總結，我嘅發言其實係三點，1改造單層垃圾站成為多層回收中心、2撥出地方俾維修師父做移花接木、循環再用、3增設「工具借用站」共用「嫁餐」減低一般人維修嘅門檻。
我嘅組織叫物料藝術交流協會，如果香港可以做到資源回收中心，我地就有物料基礎去發展Upcycling將癈棄物品，改造成用得，睇得，擺得，賣得嘅產品或者藝術品。
維修再生嘅路雖然崎嶇難行，但作為一個負責嘅人，即使冇神叫，都好應該去行囉！