體育

越南球隊願意起用年青球員,因為註2出2?

廣告
越南球隊願意起用年青球員,因為註2出2?

廣告

日前傑志驚險淘汰河內FC殺入亞冠外Play-offs,雖然河內FC輸波,但唔少香港球迷都讚佢哋班本土球員好波,特別係喺中場非常活躍嘅阮光海,今年19歲嘅佢人仔細細但技術非常好,現時已站穩河內FC正選陣腳,被認為係越南足球未來之星,近日越足協公佈U23下月友賽馬來西亞U23嘅大軍名單,阮光海榜上有名,相信佢會係今年東運會足球一大亮點球員。

而今次河內FC作客香港起用好多大後備踢正選,正選陣容除咗2位外援,佢哋班球員最細17歲,最大25歲,好似後備上場嘅國腳阮文決都只不過係25歲,但已算隊中老大哥,所以有球迷直言欣賞河內FC敢用年青小將踢大賽,其實唔止亞冠外係咁,就算喺越甲內河內FC都好肯起用年青球員,而且唔止河內FC係咁,好多隊越甲球隊正選人腳平均年齡都好年青。

我見有唔少球迷將2地對年青球員嘅支持作比較,不過冇得比嘅,喺越南做職業足球員人工福利喺當地計唔差,雖然體制方面冇泰國咁整齊,但依然吸引好多年青人願意投入職業足球壇,而當地亦好重視青訓成果,睇睇近年越南對U19、U17投入幾多資源就知,而越甲聯賽註2出2,所以本土球員得到好多出場機會,有部分球隊更唔會用盡2個外援名額,例如西貢FC早排作客嘉萊黃英正選只派出一位巴西外援,所以年青球員都會有唔少實戰機會。

而香港唔係冇好波之人,但末必會做職業足球員,年青球員又唔多夠,其實越甲只係多港超3隊,隊數唔多,但分別在於越南有一定人數本土球員,而且註2出2,所以好多年青球員有得上場,但太少外援亦有壞處,就係聯賽可觀性會減低,有好幾隊嘅入場人數一向唔太理想,例如河內FC早排主場對嘉萊黃英得2000人入場,芹苴主場對平陽得1000人,所以有利有弊,大家見到佢哋咁肯用本土年青球員,但部分球隊正為收支不平煩惱你又知唔知呢。

廣告