體育

香港約戰非洲國家友賽要數到1999年對毛里裘斯

廣告
香港約戰非洲國家友賽要數到1999年對毛里裘斯

廣告

黎巴嫩喺亞盃外抽中同香港一組,咁會留意黎巴嫩近況都唔奇,但有球迷見到上年黎巴嫩約赤道畿內亞呢類非洲對手踢友賽就覺得好驚奇,不過我就唔知有咩咁驚奇,阿聯酋上年約尼日爾,伊拉克前年約剛果民主共和國,也門近年都同尼日尼亞、乍得踢過友賽,因為地理位置問題,所以西亞足球同非洲有唔少交流,但肯約有戲金肯嚟咪得囉,幾年前印尼、泰國都約過喀麥隆踢友賽,香港一樣有機會同非洲國家友賽交流,只不過有冇呢個需要。

對上香港同非洲國家踢友賽要數到1999年,對手係毛里裘斯,當時毛里裘斯世界排名比香港高19位,雖然並非非洲足球勁旅,但當時毛里裘斯喺非洲都偶有驚喜之作,試過迫和南非,但香港都能夠贏波,不過就贏得非常驚險,上半場領先3比0下半場放慢去踢結果畀人追下一球又一球,最終險勝4比3。

提起毛里裘斯足球,都算係非洲嘅弱旅,但相比吉布提、厄立特里亞實力好得多,上年贏過進步神速嘅盧旺達,嚟緊非國盃外圍賽會對住科摩羅,預計有得打。歷史上毛里裘斯出席過一次非國盃決賽週,但已經要數到1974年,喺南非洲足球協會盃從末入過4強,最好成積都係喺印度洋運動會,2011年曾經打入決賽,同塞舌爾要以12碼解決問題,最後屈居銀牌,唯一奪金就係1985及2003年,當時毛里裘斯係東道主。

而1999年香港面對嘅毛里裘斯國家隊球員全數來自國內聯賽,都係業餘性質, Mauritian Premier League(毛里裘斯超級聯賽)要去到2011-12賽季先職業化,今季有10隊參加,包括勁旅AS Port-Louis 2000、Cercle de Joachim SC、Pamplemousses SC等,而國家隊主力大部分都係來自本土職業球隊,有少數喺海外踢職業聯賽,大多都係喺法國、法國海外大區及德國等低組別聯賽效力,其中國家隊射手Andy Sophie就喺留尼旺嘅SS Saint-Louisienne效力,而喺加拿大出生嘅Chan Yu Tin(音譯陳裕天)其父母係毛里裘斯華人,80年代移居加拿大滿地可,曾代表魁北克隊踢國際人民文化和部落錦標賽,對手有西藏、普羅旺斯及庫爾德,不過魁北克並非FIFA成員所以陳裕天可以代表毛里裘斯。

論名氣,Jonathan Bru及Kévin Bru應該係一眾毛里裘斯外流兵入面最響嘅,Jonathan Bru喺法國出生,司職防中嘅佢效力過雷恩,不過長居後備,所以轉到法丙搵食,後來轉去塞浦路斯、葡甲發展,雖然曾經代表法國U16、U17、U18、U19、U21國家隊出戰,但距離法國大國腳距離太遙遠,而佢嘅父母都係毛里裘斯人,所以2010年決定代表毛里裘斯,首次亮相對住喀麥隆就有波入,而2014年佢轉到去澳職為墨爾本勝利踢咗一季,2015年再次去葡甲落班。

司職中場嘅Kévin Bru同樣係法國長大,喺雷恩展開職業生涯,不過同Jonathan Bru一樣都係長居後備,其後被雷恩借去法乙,同雷恩分手後效力過迪安FCO、布羅尼、索菲亞利夫斯基等法甲、乙、保加利亞甲組球隊,2014年去到英格蘭加盟英冠球隊葉士域治,一直係葉士域治重心球員,如果計現時毛里裘斯外流大軍中發展最順利嘅一定係Kévin Bru,而Jonathan Bru及Kévin Bru係2兄弟,所以Kévin都跟隨哥哥代表毛里裘斯國家隊出戰。

雖然喺尋找海外合資格球員方面比同為印度洋島國嘅科摩羅冇咁積極,但比起1999年駕臨旺角大球場嘅毛里裘斯國家隊,今日呢隊實力一定高啲,最近毛里裘斯同亞洲球隊對戰要數到2013年,當時卡塔爾主動約毛里裘斯,大家試陣為主下卡塔爾以3比0大勝。

圖:
Kévin Bru、Jonathan Bru
陳裕天、Fabien Pithia

廣告