不知不覺，I-League（印度甲組）已踢到第5輪，部分球隊已齊腳，例如班加羅爾搵到洪都拉斯國腳Roby Norales填補外援空缺，但亦有球隊莫財只請一位外援，例如孟買咁只搵踢過印度甲組幾年嘅前千里達國腳Densill Theobald幫手，亞援方面吉爾吉斯及日本球員成為今年印甲大戶，有2位吉爾吉斯球員去到印甲落班，正所謂得不到香港腳就找吉爾吉斯腳，對於吉爾吉斯球員嚟講印甲無論比印度超聯落後幾多都比自己國家聯賽有規模，加上薪金待遇唔差，所以絕對去得過，而唔少土生嘅吉爾吉斯球員都有個出外搵錢之心，因為自己國家聯賽就算係踢FC Dordoi Bishkek呢啲大會都唔會高薪得去邊，所以俄羅斯、哈薩克、白俄羅斯、克里米亞、烏克蘭、塞爾維亞、巴林、泰國、馬爾代夫等國家都有吉爾吉斯球員蹤影，好似現時效力東賓高嘅吉爾吉斯前鋒Ildar Amirov早前都喺土其耳搵過班落。
而入場人數方面當然不及印度超聯，但班加羅爾對清奈城都有12,397人入場，印甲嚟講能夠破萬算唔差，莫亨巴根對邱吉爾兄弟都有10,000人入場，而最多人入場暫時係揭幕戰東賓高對艾藻爾，有12,700人入場，最少人入場嘅係DSK對邱吉爾兄弟，只有900幾人入場，我諗印甲只有2場波入場人數可以過3萬人，就係Kolkata Derby加爾各答打吡，15-16賽季最多人入場正正係東賓高對莫亨巴根，有62,342人入場，14-15賽季最多人入場係莫亨巴根對東賓高，有57,780人入場，13-14賽季最多人入場又係莫亨巴根對東賓高，有80,000人入場，12-13賽季最多人入場又係莫亨巴根對東賓高，有100,000人入場。
有啲球迷唔清楚印甲狀況以為印甲低迷情況直迫港超，當然啦佢哋有啲球隊都係好少球迷，最低迷時入場人數可以得3位數字，但佢哋啲波多人起上嚟應該係亞洲數一數二，東賓高對莫亨巴根全盛時期有13萬人入場，就算係印超球隊都做唔到嘅事，Kolkata Derby可以話係印甲一大焦點，事件起源係莫亨巴根喺1920年炒咗一位叫Sailesh Bose嘅球員，引致球隊高層Suresh Chandra Chaudhuri決定退出莫亨巴根另組球隊，而呢支球隊就以Suresh Chandra Chaudhuri家鄉為名， 即係East Bengal，港譯東賓高，正確係東孟加拉，當時孟加拉仲未獨立成國，有唔少孟加拉人因為生活移居加爾各答，因為宗教、語言、政治理念唔同嘅關係，東孟加拉成為各支球隊嘅眼中釘，好多本地人十分歧視呢班外來人，其中以莫亨巴根對東孟加拉最為火爆，成為本地人與外來人嘅大決鬥。
不過隨住孟加拉獨立，2隊球迷唔在為地緣政治及民族問題鬥到你死我活，不過每年莫亨巴根對東孟加拉都成為印度足壇最火爆嘅賽事。講起East Bengal，港譯東賓高係用音譯，Ben（賓）gal（高），其實正確叫返做東孟加拉好啲，用返東孟加拉先可以凸顯呢支球隊嘅歷史，不過東賓高呢個名流傳已久，冇計咯，同人講東孟加拉，分分鐘以為你講緊孟加拉波。