良景一年，懸案未決
被打一身，反被誣陷，臭格過年，不了了之
家偉：一年後疤痕仲係度
＊＊＊
問：當日你點解去屯門良景邨？
家偉：之前已經聽過嗰度小販嘅遭遇。到年三十晚，係網上知道有大件事發生，所以過去。
我係九點嚟到，雙方仲對峙緊。一班「管理員」推走哂車仔，用鐵馬圍住，唔俾小販攞返。邨民同小販係外面，雙方隔住鐵馬對罵。
當時其實有警察係度，同「管理員」傾左一陣，傾完全部走哂。市民都好驚訝，「你地唔係要幫市民嘅咩？」但警察冇理。
好快就發生衝突，有邨民拉走鐵馬，想開路幫小販拎返啲車。「管理員」發難，衝出嚟打人。
＊＊＊
問：你點被「管理員」打？
家偉：「管理員」指住我：「玩完嘢就想走？」幾個人㩒我係地下，打左兩三分鐘。傷勢唔算嚴重，但最深刻係佢地箍實我條頸，而且佢地㩒低我打我時，膝蓋不斷磨擦地面，傷口幾深，大概兩個月先好番，到今日疤痕仲係度。
跟住啲警察先返嚟。「管理員」交我俾警察，落「孖葉」上警車。
＊＊＊
問：Sorry 打住，以為係你報警。「管理員」打完你，交你俾警察，警察拉左你？
家偉：根本冇人知佢地係咩，戴哂口罩，剩係著住有「管理員」嘅 jacket。但警察當正佢地係執法人員，完全信佢地，照單全收。
當時警察根本未諗到 charge 我乜嘢。到警署落口供，先話我罪名係「襲擊導致他人受傷」。
落口供時，警察不斷問我「係咪本土派，係咪熱狗」。我膝頭不斷流血，但係醫院等驗傷時，警察始終唔肯放「孖葉」，12 點後扔我入臭格。
當時我完全唔知旺角發生咩事，只係見路過嘅警察睇緊手機，好記得佢地講，「依班人痴左線，俾我係現場我都會開槍」。我八卦問可唔可以睇吓，佢地窒我「你俾人塌緊喎」。
＊＊＊
問：現在你仍然保釋？打算怎樣跟進？
家偉：有閉路電視，又有媒體片段，我好清楚自己冇位俾人入到。續保半年後，因為要去台灣實習，我問警察查清楚件事未，佢地只准我兩個月後報到，我忍唔住索性踢保。
佢地帶我到一間房，叫我「唔好玩嘢」，我堅持。卒之佢地冇塌我 48 個鐘，放左我走。
我最近睇香港 01 同有線報道，先知警方唔再跟依件事，但我覺得應該要挖落去。我會等區議員查成點，再聯絡一齊被拉嘅受害者，商量點跟進。