「我發覺自己請錯咗人。」
主管Peggie到pantry加熱飯盒時，趁空檔跟正在清洗飯後果的Sarah，大呻對新下屬的不滿。
「當初你又請佢？」
對這毫無前文後理丟下來的閒話，Sarah假裝好奇的回應。
「公司急住要人嘛，你自己唔請，陣間大老細塞件『黃馬褂』畀你，咪仲煩！」
「咁面試嗰陣，你冇睇清楚先請咩？」
「好老實講，見得一粒鐘，點睇得清邊個真係掂！上得嚟見工，個個都將自己最好嗰面畀你睇，你嗰team嘅Joyce面試嗰日畫晒眼線搽埋口脣，返工第二朝咪即刻現真身！」
聽到好姊妹的名字，Sarah來不及反應，Peggie已繼續依然故我大發偉論。
「請人嗰時，你問佢『expected salary幾多？』，佢梗話『人工唔係最大concern，最重要係有前途，學到嘢』；問佢『介唔介意OT？』，佢梗答『唔介意』，三十歲人仲好似fresh grad咁aggressive、咁有火，好似要話畀全世界知自己幾咁鍾意份工！」
「好正常啫，搵工就係要搵辦法sell自己，你做marketing冇理由唔曉。」
「我知，所以反正個個對答差唔多，不如請個氣場夾、合眼緣嘅仲好！當時見咗四個人，有兩件望個樣已經請唔落，依家呢個感覺合作得嚟咪請囉，人夾人緣嘛！」
「同個新仔唔夾咩？之前仲聽你讚佢係醒目仔！」
「開頭係幾好，後來叫佢寫brief先知出事！」原本困在喉嚨的聲線，突然隨著股怨氣扯起來。「我搞到依家先叮飯，咪就係要幫佢執grammar！呢一代啲英文真係唔得掂！」
「咁又唔好一竹竿打一船人！」Sarah扭緊水掣，抹乾外皮，沒好氣的說。
「我依家睇返張resume，先知佢英文攞F，間大學名完全未聽過！」
「咩話，你唔睇resume就請人？」
「份份差唔多，睇嚟咪浪費時間！一日收六、七封求職信，covering letter同一個template，中間肯將『your company』改返做公司名，已經算有誠意！至於resume，上得嚟見工嗰四個都係degree holder，點諗到會出事！」
「你請人睇眼緣，resume望都唔望就畀offer，咁依家點？」
Sarah見Peggie搖頭嘆氣，只得追問：「唔知點好？一係extend probation，一係炒佢！」
「唔炒得。」Peggie欲言又止，一臉無奈。
「點解？」Sarah終於對這閒話產生好奇。
剛到高潮位時，微波爐「叮」一聲打斷了她倆的話題。Peggie拿出飯盒，返回座位前給Sarah拋下答案：「簽咗死約，五年後先炒得！」