立即捐款

鍾劍華

理大應用社會科學系助理教授/理大社會政策研究中心主任 網誌

政經

真係乜都佢講晒 只許林鄭式民粹

真係乜都佢講晒 只許林鄭式民粹
廣告

廣告

為咗爭取漁農界60票,連新鮮雞佢都話鍾意食囉,咁唔係民粹係乜?中央屠宰唔再講?香港永遠不會再有禽流感?人口稠密不用再擔心活禽形成的公共衛生風險?

去到鄉議局,丁屋就唔再係佢嘅問題,僭建可以重新諗過。夠唔夠民粹?

玩盡小圈子嘅好處,個個小圈子嘅小圈子內都搵個頭頭入去佢競選辦。呢啲人情債淨係林鄭月娥唔使還?

城中大孖沙、藍血富二代、本土義和團頭目出嚟撐佢埸,唔通全部免費?我唔信囉!

佢嘅意思,D冇名冇姓小市民響應眾籌捐幾皮,薯片雖然乜都冇應承過,就連泛民選委要推翻831政改框架薯片都唔肯講,咁就已經叫好民粹啦。

佢自己騎劫長者生活津貼、拎住個乜嘢跟尾政策都冇嘅貧窮線,就叫做熱心扶貧助弱,攞出嚟做賣點都唔可以話係玩民粹!

佢話要善用儲備,要思考儲起嘅錢點用,要有套新嘅理財觀念。咁算唔算係玩民粹?其實佢以前唔係都講過,要提防結構性赤字咩?唔係話推行全民退保會淘空儲備咩?唔係公開講過公共理財唔係咁咩?

佢對住班有錢佬,又會話要拆檣鬆綁,要方便營商,仲要叫佢哋放心佢唔係社會主義者喎,咁又算唔算係另一個面向嘅民粹?

算啦,龍門任佢搬,標準隨時變。任何其他對手講乜施政理念都可以係亂作承諾,都係要不得的民粹。林鄭式的面面討好就唔算係民粹!

其實都冇諗過要回應薯片眾籌。林鄭此言,我決定俾薯片民粹一次,一陣上去捐五皮。

廣告