政經

關於 LESSER EVIL 的簡單五點

廣告
關於 LESSER EVIL 的簡單五點

廣告

其實好唔想進入lesser evil 既討論,一來我無得投,二來無論我講咩都唔會左右到選委如何提名投票,所以都係口痕講兩句:

一,我地假設林鄭同鬍鬚都會推政改推廿三條,係呢個打平手既基礎上,所謂lesser evil 就係指邊個推會將對我地所欲之政治價值的傷害性減低;如果要求任何一位提出唔推廿三條或者831(事實上鬍鬚無係政綱寫831),咁我地搵既係angel 同greater angel,或者archangel。但無論邊個做呢D政治問題,民間也不可能休養生息。

二,係以上打平手既政治問題外,所謂lesser evil ,就係睇邊個會做一D減低破壞所欲之政治價值的法例或政策。我猜測主流民意會好認同鬍鬚講研究落實防賄條例適用特首(有得拉689坐監會大快人心),及特首是否仍當大學校監等議題;而研究改革稅制,又好難令主張財富再分配者反對(當然,而家都係吹水階段者);

三,我到呢刻仍然支持泛民,或更具體係自決派出選。二次前途、民主自決、公平正義、中港關係、未來的城市想像等議程,若果在今次選舉缺席,就很難「翻生」;經過雨傘後的區選、立選,有十多二十萬票支持的(本土)自決派和激進派,真要想想如果部署,以免完全失語(這些部署,不應包括花精力攻訐主要受中產專業支持的溫和民主派)。

四,如果鬍鬚要爭取民主派選委支持,一定係互相討價還價。你要求鬍鬚做ABCD,佢都會要求你唔好阻佢做EFGH。咁民主派選委可以做咩讓步妥協呢?又,如果鬍鬚要做所謂大和解同團結香港,就唔可能將西環土共派趕盡殺絕,可預見呢班左佬同中資代理仍然會被安置係建制中。所以大家無謂對趕絕中聯辦、休養生息有過高期望。

五,思考如何應對林鄭當選係容易的,但鬍鬚當選,如何同佢角力,係難好多。我未諗到,想花多點時間思考呢方面。

廣告