體育

屬於印尼少數民族的職業球隊——馬都拉聯

廣告
屬於印尼少數民族的職業球隊——馬都拉聯

廣告

正當香港球迷仍然替傑志最後關頭互射12碼不敵蔚山而感到可惜時,印尼總統盃依然火爆上演中,今年亞洲球會賽缺少印尼呢幫「問題成員」,因為印尼足總比香港足總更失敗,內部低級失誤令印尼球會最快要2018年先可以重返亞洲舞台,因此自家製嘅總統盃就成為彌補印尼球會無法參加亞冠外及亞協盃嘅圍內「飛機盃」。

雖然係圍內打飛機用,但對於大部分球隊而言,總統盃仲有一個意義,就係試陣,唔少新援及本土球員轉會及初登陸,總統盃成為佢哋考牌戰,而冠軍獎金係香港河水盃三倍,所以競爭十分激烈,亦令餓波嘅球迷提供一個消閒嘅平台,因此四組東道主球隊首次比賽有三場球場看台都擠得水泄不通,今晚輪到最後一組球隊亮相,呢組由Madura United FC(馬都拉聯)做東,主場位處爪哇島東北部馬都拉島,主要居民係馬都拉族人,馬都拉島嘅原住民,球隊前身係來自萬隆嘅Persipasi Bandung Raya,2016年被收購正式改名為Madura United ,並遷移主場去到馬都拉島,同時另一支本身叫Madura United ,喺1970年成立嘅馬都拉球隊由Persepam Madura United改名為Persepam Madura Utama參加第二級聯賽,因此部分本先支持Persepam Madura United嘅球迷改為支持買殼建立嘅Madura United ,因為Madura United參加頂級聯賽,而部分Persepam Madura United死忠則拒絕支持毫無歷史嘅Madura United,導致球迷人數被分薄,上季印錦賽A,Madura United平均入場人次有6008人,比起2013年初次升參加超聯嘅平均入場人次12043少好多,不過以馬都拉島呢個市場勉強可以容納兩支職業球隊,有競爭都係好事,以現時總統盃火爆氣溫,就算今晚Madura United主場Gelora Ratu Pamelingan可以載滿35000人都唔奇。

提起馬都拉島,一定會講起島上原住民馬都拉人,馬都拉人總人口700多萬,比華人少300萬,主要聚居馬都拉島及東爪哇各地,上世紀因為爪哇島人口過多,部分馬都拉人被政府遷移去西加里曼丹及中加里曼丹省,距離馬都拉島千多公里嘅地方,由於馬都拉人信伊斯蘭教,生活文化與信奉原始宗教及基督教嘅加里曼丹原住民達雅人唔同,馬都拉人出名比較勤力及善於經商,因此經濟差距、生活文化與信奉唔同下雙方經常發生衝突,最後演變種族大屠殺,又稱2001年中加里曼丹種族衝突,大量馬都拉人被達雅暴徒屠殺,最後搞到好多馬都拉人走佬返馬都拉島及爪哇島各地,雖然返到去馬都拉島,即使同爪哇及巽他人一樣信伊斯蘭教,不過一直受爪哇及巽他人不公平對待,去到邊畀人恰到邊,直到近年種族方面先冇咁多風波,所以Persepam Madura United或者Madura United對於部分馬都拉球迷嚟講有個特別意義,除咗代表馬都拉島,仲代表住馬都拉呢個天生對工作、生活比較熱情嘅民族,雖然經常畀人恰,但佢哋同華人一樣,去到邊都餓唔死。

引發2001年中加里曼丹種族衝突嘅原因之一同政府強制遷移人口政策有關,政府可以話係兇手之一,而事件發生後政府並冇即時阻止,只以無能為力做藉囗,而當時事件起因說法眾多,其中原因包括馬都拉人長期唔尊重達雅人,但無從稽考,現時馬都拉人與達雅人關係冇咁對立,但依然有當地死亡金屬樂隊以中加里曼丹種族衝突做專輯主題,希望透過故事及音樂喚起後人對種族問題嘅反思。

同馬都拉人一樣,華人都係加里曼丹一個善於經商嘅民族,都被達雅人追殺過,但雙方不同之處就係好多華人一到危急關頭就會各顧各,而馬都拉人就比較團結,就算唔夠你打,都要你斷一隻手冇一隻眼嗰種,所以達雅人同馬都拉人之間點解咁多仇恨,就係因為馬都拉人唔會好似華人咁為生活而苦苦忍耐,佢哋會聯黨還拖,喺好多馬都拉人眼中好服印尼華人勤力本性,但就認為華人唔夠團結。

廣告