大家見到幅圖，第一時間應該睇得出呢隻貝貝龍iv低，cp低兼爛技，點解我要Post佢出嚟？因為佢係由7月28號加入呢場無盡旅途開始，到事隔剛剛半年嘅1月28號，先喺馬鞍山拜年時捉到，係我第一隻亦係目前唯一一隻貝貝，係我最珍而重之嘅一隻精靈。
今朝我見到一個post，問到呢一刻仲有幾多人堅持玩呢隻game，先至諗起原來我自己由半年前7月28日開始，日復一日，返工放工每一程都冇停過。我玩得算幾黑，亦唔算最勤力，卡比我一隻都未捉過，啟暴龍都係早幾個月屎忽撞棍屋企樓下捉到一隻，講圖鑑我連第一代都未畢業（目前135），直到而家，我仲有幾隻精靈儲住二三百粒糖唔捨得進化。
呢個熱潮嚟得快去得快，我預咗，我係冇預到自己可以堅持到而家。好多家人朋友笑我「隻game興完架勒喎！」「你仲玩？」每一次我都只係答：「有啲嘢係要堅持。」一開頭，我係為咗儲齊圖鑑，冇耐，就想稱霸道館r金幣，熱潮好快就退，公園逐漸只係淨低uncle aunty同幾個散兵游勇，但呢班已經不成氣候嘅孤臣孽子，年紀背景階層都各不相同，唯一就係我哋仍然堅持緊。
我好深印象嘅係，之前御三家event，太和附近出現一隻水箭龜，衝到過去就消失咗，但就見到一個西裝友，一位學生，一個著住圍裙嘅阿婆，同一個泊好車嘅退休uncle，大家傾起呢隻冇人捉到嘅水箭龜，四個本應老死不相往來嘅人就扣連埋一齊，呢一刻，我好明呢隻game獨有嘅魅力，令我好知道堅持嘅理由。（亦都好深刻，個婆婆喺我面前孵咗隻貝貝出嚟）
呢隻game曾經係一個熱潮，而家係一種堅持。生活有太多挫折、太多被迫放棄嘅大小事。曾經返工放工，係代表一日壓力嘅開始，同疲累無力嘅稍息，呢隻game只係做咗好微小好微小嘅改變：就係令到條路偶然有令人開心嘅小發現，孵出一點小驚喜。佢改變咗好多人嘅每一程，佢為呢種日復一日嘅無情，加上咗一份微小但有趣嘅小意義。
當個個都玩pokemon go，唔玩，就冇話題；但當個個都唔玩pokemon go，仲玩，就變成人茶餘飯後嘅話題。要放棄好易，應該係話太容易。當熱潮退去，你我仍然堅持，喺不盡相同嘅路上搵到一個同路人，或者可以一齊點個頭，問候一句「有冇捉到咩好嘢？」，呢個，就係呢隻game俾我哋最大嘅獎勵，一個最小嘅堅持理由。
俾呢個世界改變好容易，改變呢個世界好難，要唔俾呢個世界改變，係最難嘅一件小事。每位衝過嘅爛技低iv貝貝龍，都係關於堅持、關於一份鬥志，屬於你我，最獨一無二嘅故事。
——獻給仍每日堅持在修行旅途嘅每位精靈大師。