圖一：林芷筠（規劃師、CoVision16 成員、建築測量規劃園境界選委）
林芷筠：民主派政黨帶領民主運動，應該要求曾承諾，而唔係幫佢解釋
＊＊＊
品客薯片雖討人歡喜，但依然太高卡路里，一眾民主派選委仍意見分歧。部分人只求有啖好食，見到原味已經衝左出嚟；然而其他人對 831、23 條仍心存顧忌。
曾俊華有見及此，最近推出淡藍味。但進步的選委，要求實牙實齒的承諾，才會考慮提名。
＊＊＊
問：所有派系的候選人都已起跑，你有何心水？
林芷筠：暫時傾向胡官合格，值得提名佢入閘。
團隊的提名策略，介乎胡官與曾俊華之間。最近曾有小小鬆動，暗示任內完成不到 23 條立法。但依然比較含糊，唔算係承諾，我地會要求佢講清楚。
問：你傾向原則派抑或策略派？
林芷筠：民主 300 + 有三個原則＊，而家唔見左，做乜嘢？喂，選嗰時咁樣講過喎，大佬。
你有個講法轉一轉都好，而家有啲人「我仍然堅守原則架，不過市民意向。。。」轉得幾快。
民主派政黨帶領民主運動，應該迫曾俊華承諾更多，而唔係幫佢解釋，「林鄭做就弊啦」，同曾俊華一齊搞公關，反過來夾選委。
（註：三大政綱為反對梁振英連任、反對人大 831、捍衞香港核心價值）
問：如果最後團隊始終要策略投票，你要求 lesser evil 承諾什麼才收貨？
林芷筠：如果講提名，我地十六人可能有唔同分佈，或者多揀胡官，或者全俾胡官都唔定，可能有比例上嘅分工。而曾俊華，個人暫時未收貨。要視乎佢會否承諾，政改通過後才開始 23 條立法。
你可能話胡官太理想化，但胡官嘅承諾比較清楚，希望曾俊華都可以有同樣承諾。
至於投票真係未諗好，要睇最後嘅形勢。
＊＊＊
圖二：陳曦彤（通識科老師、教協成員、教育界選委）
問：所有派系的候選人都已起跑，你有何心水？
陳曦彤：冇。我有幾個原則，
一、團隊點諗，希望維持團結；
二、而家有幾個路線，除了公民推薦，最近還有一個「All in 胡官」的計劃。我同雙方都有聯繫，希望中間的過程，能為香港帶來最大利益。
問：你傾向原則派抑或策略派？
陳曦彤：我唔鍾意入派，但傾向以原則為重。我已經見過幾次曾俊華，除左公關技巧特別出色，唔覺得佢幾 lesser evil。我唔係好 buy 佢嘅論述。
問：如果最後團隊始終要策略投票，你要求 lesser evil 承諾什麼才收貨？
陳曦彤：如果胡官有幸當選未必係壞事，例如 22 條立法幾有創見；先普選後再推 23 條亦重要。如果曾俊華能夠接受，我地係政制上先可以接受。
但曾俊華做左差不多九年財政司，如果延續任內守財奴的風格，對社會發展並非好事，要睇吓佢嘅政綱肯唔肯改進。
＊＊＊
圖三：張志偉（社工、社總代表、社福界選委）
問：所有派系的候選人都已起跑，你地有何心水？
張志偉：我地仲未確認邊個候選人。
一來我地要睇所有參選人嘅政綱；二來會參考民主 300 + 嘅討論；三來要睇公民推薦計劃。之後先會決定點樣揀法。
問：你地傾向原則派抑或策略派？
張志偉：我唔係咁睇問題。如果提高層次嚟睇，大家都係推動民主，我唔覺得分裂。只不過原則行先，抑或策略行先，對民主嘅成效大啲？
而家形勢實在變幻莫測，犯不著咁早下決定。
問：如果最後團隊始終要策略投票，你地要求 lesser evil 承諾什麼才收貨？
張志偉：我地會守住參選時民主 300 + 嘅政綱；仲會等公民推薦能否達三萬八千票門檻嘅結果；最後會睇 25/2 我地舉辦論壇，佢地係論壇嘅表現。如果連嚟都唔肯，唔尊重選民，就未必會提名。